Prezident İlham Əliyev hesab edir ki, Azərbaycan-Fransa münasibətlərində böhranın səbəbi prezident Makrondur

Prezident İlham Əliyev Fransanın siyasi elitasını "Azərbaycanofobiya"da ittiham edib,  bu məsələ ilə bağlı "konsensus"olduğunu deyib. Bu barədə o, yerli telekanallara müsahibəsində deyib.

O, rusiyalı sülhməramlıların Qarabağda olduğu zaman fransalı siyasətçilərin oraya qanunsuz səfərlərini xatırladıb. Onlar Paris meri və Fransanın keçmiş baş naziri olub.

O, bunu islamofobiya, ksenofobiya və erməni lobbisinin təsiri ilə izah edib.

"Hakim elitanın bir çox rəhbərləri 2020-ci ildəki qələbəmizi öz məğlubiyyəti kimi qəbul etdilər", - Əliyev davam edib. Daha sonra qeyd edib ki, Makron onu "Dağlıq Qarabağın tanınması" ilə hədələyib.

"44 günlük müharibə zamanı Fransa prezidenti mübarizəni dayandırmaq üçün bir neçə dəfə zəng etdi. O vaxt Dağlıq Qarabağı tanımaq üçün təhdidlər var idi. Mən cavab verdim ki, Dağlıq Qarabağı tanıyan istənilən ölkə dərhal bizdən diplomatik münasibətlərin pozulması barədə nota alacaq", - Əliyev bildirib.

Onun sözlərinə görə, münasibətlərdə böhran məhz Makronun dövründə yaranıb. Digər prezidentlərlə ikitərəfli münasibətlərdə heç bir problem olmayıb.

Bununla yanaşı, Əliyev qeyd edib ki, son aylarda Bakı Fransa hökumətinin nümayəndələrindən "əlaqə yaratmaq üçün" siqnallar alıb. Onun sözlərinə görə, Bakı buna hazırdır, lakin müəyyən şərtlər altında. O işarə edib ki,  münasibətləri bərpa etmək istəyənlər Bakıya gəlməlidirlər.

"Əsas odur ki, bizə toxunmasınlar, işlərimizə qarışmasınlar və Cənubi Qafqazın işlərinə qarışmasınlar", - Əliyev deyib.

Sonra o, Fransa şirkətlərinin iştirakına toxunub. "Azərbaycanda uzunmüddətli müqaviləsi olan şirkətlərdən başqa, digər Fransa şirkətlərinin iştirakı demək olar ki, sıfıra endirilib. Biz həmişə öz öhdəliklərimizə hörmət edirik və siyasi çətinlikləri şirkətlərin fəaliyyətinə ötürmürük. Fransa şirkətləri belə hakimiyyətə sahib olduqlarına görə günahkar deyillər", - Əliyev bildirib.