Seçki və digər zəruri prosesləri əngəlləyən natamam reform barədə.

Azərbaycan hökümətinin 10 il bundan qabaq başladığı və bu günə qədər yarımçıq qalmış olduqca vacib bir islahatdan qısaca bəhs etmək istəyirəm.

2013-cü ildə Bakının və ölkənin dıgər şəhərlərinin küçə və prospektlərində binalara Avropa standartlarına uyğun və yeni qaydalarla ünvanların verilməsi və müasir dizaynlı lövhələrin vurulması işlərinə başlanılmışdır. Bu işlər Azərbaycan Respublikası Prezidentin 10 fevral 2012 il tarixli "AR Prezidentinin 2008-ci il 27 noyabr tarixli fərmanı ilə təsdiq edilmiş Azərbaycan Respublikasında ünvan reyestrenin aparılması və daşınmaz əmlak obyektlərinə ünvan veriməsi Qaydaları"nda dəyişikliklər edilməsi barədə" fərmanına müvafiq aparılırdı. İslahatlar imzalanmış qrant sazişinə uyğun olaraq Norveçdən və Danimarkadan olan məsləhətçilərin köməyi ilə həyata keçirilirdi. Eyni zamanda yeni qaydalara uyğun ünvanların verilməsi işlərinin təmin olunması məqsədi ilə Cənubi Koreyanın şirkəti tərəfindən Azərbaycan Ünvan Reyestrenin İnformasiya Sistemi yaradılmışdır. Yeni ünvan lövhələrinin binalara vurulması əsasən 2013-cü ilin sonuna qədər başa çatdırılmışdır.

Bu yeni qaydaların nə qədər səmərəli və Bakının şəhərsalma xüsusiyyətlərinə uyğun olub olmamasını qoyuram kənara, (buna dair müttəxəssislərin rəyini öyrənmək maraqlı olardı), halbuki ilk baxışdan onlar əvvəlkilərindən daha mürəkkəb və çaşdırıcı görünür.

Əgər əvvəlki qaydalara müvafiq olaraq bir binanın vahid nömrəsi vardısa və yaşayış bloklarının sayına uyğun ümumi mənzillərin sayı aparılırdısa, indi binanın hər yaşayış blokuna ayrıca nömrə verilir və onun içindəki mənzəllər 1-dən hesablanır. 

Məsələn, İnşaatçılar prospektində yerləşən və "rəssamların evi" kimi tanınan beş mərtəbəli yaşayış bina əvvəllər  “İnşaatçılar pr. 28!” ünvanı daşıyırdısa yeni qaydalara əsasən onun fasad tərəfindən “İnşaatçılar pr. 80-96” lövhəsi vurulub, arxa tərəfdən, yəni yaşayış bloklara girişi olan həyətda isə hər yaşayış blokunun üzərindən müvafiq olaraq 80, 82, 84, 86, 88, 90, 92, blokların sayına uyğun lövhələr yerləşdirilib. Bundan əlavə hər blokun mənzilləri indi 1-dən hesablanır. Amma buna baxmayaraq mənzil qapılarının üzərində köhnə nömrələr qalmaqdadır. Yəgin onların dəyişdırılməsini sakinlərin üzərinə qoyulub.

Narahatedici məsələ odur ki, bütün məlumat bazalarında bu günə qədər köhnə ünvanlar göstərilir.  19 saylı dairə seçki komisiyyasının qapısı üzərində “Təbriz küçəsi 106” ünvan lövhəsi olduğu halda bütün məlumat bazalarında onun ünvanı “Təbriz küçəsi 68” kimi göstərilir.

Ən əsası isə MSK saytında ünvanların köhnə qaydaları ilə göstərilməsi qalmaqdadır və bu seçki prosesinə birbaşa mənfi təsir göstərir,dairə və məntəqə komissiyalarının işinə əngəllər törədir.

Üstəgəl Daxili İşlər Nazirliyinin  yeni nəsil şəxsiyyət vəsiqələrində vətəndaşın yaşayış ünvanı yazılmır, və tutaq ki imzatoplama kampaniyası zamanı yaxud siyahıların dəqiqləşdirilməsi prosesi zamanı sakinlər öz ünvanlarını özləri şifahi şəkildə deməlidirlər, onların əksəriyyəti isə köhnə ünvanlarını deyir, çünki təzəsini bilmirlər. Səsvermə günü bu problem “Verifone” adlı elektron oxucu qurgu ilə tənzimlənir, lakin imzatoplama kampaniyası zamanı belə bir imkan nəzərdə tutulmur. Beləliklə hazırda respublika ərazisində 2013-cü ilə qədər tikilmiş binalarda ünvanlarla bağlı bu cür qeyri müəyyənlik hökm sürür.

Nəticədə, 10 il bundan qabaq aparılmış və icrası təmin olunmuş kimi göstərilən islahat əslində əlavə süründürməçilik, qeyri-müəyyənlik yaradıb və dövlətin müvafiq icra orqanlarının arasında koordinasiyanın olmamasını üzə çıxarıb.

Növbəti seçki dönəminə artıq kifayət qədər vaxt var  və bu sahədə işlərin tənzimlənməsi məqsədəmüvafiq və zəruri görünür.

19 saylı Nərimanov birinci seçki dairəsinin seçki komissiyasının katibi,

Emin Babayev