Fake news nümunəsi

Dünən “Yeni Azərbaycan” qəzeti və hökumətə bağlı 5-6 sayt Milli Şuranın adından rus padşahı Vladimir Putunə bir saxta məktub dərc edib. Bu məktub əhvalatı mənim yadıma Kiyevdə knyaz Svyatopolk İzyaslaviçin ölümündən sonra boyar dumasının 1113-cü ildə Putinin ulu babası II Vladimir Monomaxa yazdığı məktubu saldı. Onlar yazırdılar ki, knyaz təcili olaraq Kiyevə gəl, sən gəlməsən çox böyük təlatümlər olacaq, şəhər talan ediləcək, boyarlara və monastırlara hücum olacaq.

Sən demə üzərindən 900 il keçəndən sonra – 2013-cü ildə belə bir məktubu Milli Şura Vladimir Monomaxın nəvəsi III Vladimir padşaha Milli Şura yazıb, öz ölkəsində demokratiya edam kötüyünün üstündə qətlə yetirən Putindən demokratiya umub, ölkəni ona satmağa hazır olduğuna hazır olduğunu bildirib. Bir sözlü yeni Azərbaycan İlham Əliyevin etdiyi əməlləri bizim adımıza yazıb.

Böyük rus yazıçısı Anton Çexov Azərbaycanın da daxil olduğu Rusiya imperiyası üçün yazırdı ki, bu ölkədə dəlilər evi tikmək lazım deyil, dəlilər şəhəri salmaq lazımdır. İndi görün “ağıllı kənd” salanlar nə yazırlar: Hörmətli Vladimir Vladimiroviç. Azərbaycan dövlətinin yaxın qonşusu, etibarli strateji tərəfdaşı olan bir ölkənin Prezidenti və xalqımızın sadiq dostu kimi Sizin ədalətinizə inanır, səmimiyyətinizə güvənirik.” Bunlar sadəcə olaraq Trampın Putinə təpkisindən sonra İlham Əliyevin 20 il ərzində Vladimir padşaha dəfələrlə yazdığı “səmimi” məktubları indi Milli Şuranın adına çıxmaq istəyirlər. Süni intellekt dövründə mağara təfəkkürü ilə yaşayanlardan bundan artıq nə gözləmək olar. Axı, hələ iki ayaq üstündə yerimək insan olmaq demək deiyil, insanlığın ibtidai əlamətlerindən biridir.

Sən demə Milli Şura öz ölkəsində demokratiyanı boğan, yadfikirliliyə qarşı barışmaz mübarizə aparan, azad sözü məhv edən, bütün qonşuları və bütün dünya üçün təhlükəyə çevrilən Putindən demokratiya diləyirmiş. Axı, millətdə görür, dünyada qanır ki, Milli Şura yaranandan onun işi elə Rusiyaya qarşı mübarizə aparmaqdır, Putini ifşa etməkdir, Azərbaycanı Rusiyanın yedəyinə bağlayan İlham Əliyevdən hesab sormaqdır.

Bu sərsəm məktub təxminən 2016-cı ildə Azərbaycan hökumətinin təpədən dırnağa qədər Gülən şəbəkəsi ilə iç-içə olduğu bir dövrdə Faiq Əmirlini Gülən camaatının imam xətibi elan etməsi kimi bir şeydir. Yəni belə bir saxta məktubu uydurmaq üçün çox geri zəkalı və utanmaz olmaq lazımdır.

Necə olur ki, ölkənin birinci vitse-prezidentine, Heydər Əliyev fondunda onun vitsesinə, hökumət üzvlərinin az qala yarısına Putin “Dostluq” ordeni paylarır, amma Milli Şura “Qətiyyətli və demokratik Lider kimi” ondan kömək umur. Belə bir köməyi 21 il ərzində İlham Əliyev, YAP hakimiyyəti Putindən umub. Bir neçə gün əvvəl həftənin icmalı proqramında AzTv bəyan edirdi biz heç vaxt şimal qonşumuza xəyanət etməmişik, biz həmişə onun yolunu saxlamışıq, onunla dost, qardaş, müttəfiq olmuşuq. Bir ay əvvəl İlham Əliyev Rusiyanın “Vesti” kanalına müsahibəsində Rusiya ilə müttəfiqliyə sadiq olduğunu bəyan edirdi, Azərbaycanda rus məktəblərinin və rus dili öyrənənlərin sayı barədə Putinə hesabat verirdi, az əvvəl hər il Rusiyadan 5 milyard dollar həcmində yarasız silah aldığını vurğulayırdı.

22 fevral 2022-ci ildə Putinlə İttifaq Bəyannaməsini də bəlkə İlham Əliyev yox, Milli Şura imzalayıb. Məhz həmin dövrdə Putinin revanşımı ortada deyildimi, Ukraynanın Donetsk, Luqansk, Krım vilayətləri Rusiya tərəfindən işğal edilməməişdimi? Məhz həmin müqavilə ilə İlham Əliyev Azərbaycanı Rusiyanın yedəyinə bağladı. Bu müqavilə ilə İlham Əliyev Rusiyanın Azərbaycana müdaxiləsi üçün hüquqi baza yaratdı. 21 ildir İlham Əliyev Putini öz hakimiyyətinin əsas dayağı hesab edir, onu dünyanın bir nömrəli siyasətçisi bəyan edir, etibarlı dayağı kimi Putin məni satmaz deyir, hətta Moskva ilə silah müamiləsindən "otqat" alır, amma sən demə Milli Şura Putinə gizli məktub göndərib İlham Əliyevi yıxmaq istəyir. Nə deyəsən adamlarda utanan üz yoxdur.

Ötən ilin oktyabrında Putinin təhlükəsizlik xidmətinin direktoru Sergey Narışkin Bakıya rəsmi səfərə gələndə onunla gizli danışıqlar aparıb yaxın gələcək üçün təhlükəsizlik sahəsində yaxın gələcəyin prioritetlərini müəyyən ediblər və bildiriblər ki, xüsusi xidmətlərin xətti ilə Rusiya-Azərbaycan əməkdaşlığı dinamik şəkildə inkişaf edir, konstruktiv, qarşılıqlı səmərəli və etibarlı xarakter daşıyır. Sergey Narışkinlə İlham Əliyevin görüşündən sonra Rusiya tərəfinin yaydığı məlumatda qeyd edilir ki, Rusiya və Azərbaycan xüsusi xidmətlərinin qarşılıqlı əlaqələrində Qərb xüsusi xidmətlərinin dövlətlərimizin daxili siyasi sabitliyinin pozulmasına yönəlmiş düşmənçilik niyyətlərinin müəyyən edilməsi səylərinə xüsusi yer ayrılıb.

"Xarici xüsusi xidmətlərin Rusiya və Azərbaycan ərazisində sosial-siyasi vəziyyətin sabitliyinin pozulması məqsədilə sistemsiz müxalifətdən və beynəlxalq terror təşkilatlarından istifadə etməsinə qarşı birgə səylərin gücləndirilməsi zərurəti qeyd edilib", deyə Rusiya XKX-nin məlumatında bildirilir. İlham Əliyev və Əli Nağıyevin Rusiyanın Xarici Kəşfiyyat Xidmətinin direktoru Sergey Narışkinlə görüşdən sonra yayılan məlumada göstərilir ki, "Xarici xüsusi xidmətlərin Rusiya və Azərbaycan ərazisində sosial-siyasi vəziyyətin sabitliyinin pozulması məqsədilə sistemdənkənar müxalifətdən (yəni Milli Şura və Xalq Cəbhəsi) və beynəlxalq terror təşkilatlarından istifadə etməsinə qarşı birgə səylərin gücləndirilməsi zərurəti qeyd edilib.”

Deməli 4 ay bundan öncə İlham Əliyev Rusiya Xarici Kəşfiyyat Xidməti ilə əlbir olub Milli Şuraya qarşı birgə mübarizə haqqında müzakirələr aparır, “Yeni Azərbaycan” qəzeti isə beynəlxalq aləmdə bir balaca Tramp mehi əsən kimi Milli Şuranın 12 il bundan əvvəl olmayan məktubunu “müasir dizaynda” dərc edir. Bəs nə oldu dördcə ay əvvəl Narışkinlə birləşib “Qərbin daxili siyasi sabitliyinin pozulmasına yönəlmiş düşmənçilik niyyətlərinin” qarşısını almaq planlarınız? Suya düşdü?

2022-ci ildə Putin Rusiyası və 2024-cü ildə kommunist Çini ilə Qərbə qarşı İttifaq müqaviləsi imzalayıb Moskvaya və Pekinə sığınan İlham Əliyev deyildi, Milli Şura idi? Görünür Donald Tramp bir az bərk qışqırsa “Yeni Azərbaycan” yeni bir gizli məktub tapacaq ki, dünyanın qərblə dirəşən iki azman imperiyası ilə ittifaq müqavilənin ideyası İlham Əliyevdən yox, Milli Şuradan gəlir. Bunlara nə var ki? İlham Əliyevlə Bəşər Əsədin çıxışlarına baxsan bir-birlərinə “Əziz qardaşım” deyə müraciət etməkdən yorulmurdular. Amma Əsəd rejimi süqut edən kimi İlham Əliyev onu tarixin zibilliyinə ünvanladı. Çeviklik, siyasi sayıqlıq bax buna deyərlər.

İndi əsas “tapıntı” kimi Milli Şuranın Vladimir padşaha şanlı və şanlı olduğu qədər də gizli məktubunun altındakı imzalara gələk. İlham Əliyevin Milli Şuranın adından Putinə yazdığı gizli məktubu görün kimlər imzalayıb: Mənim, Əli Kərimlinin, Gültəkin xanımın, Vidadi Mirkamalın ön yerləri bölüşməyimiz “anlaşılandır”. Siyahıda 3-cü imza atan kimi göstərilən Tofiq Yaqublu Milli Şura yaradılandan 4 ay əvvəl – 2013-cü ilin fevralında saxta “İsmayıllı işi” ilə bağlı həbs edilib və 2016-cı ilə qədər həbsdə saxlanılıb. Görünür prezident aparatından hansısa “etibarlı” adam cəzaçəkmə müəssisəsinə gedib Tofiq bəyə imza “atdırıb”. Digər tərəfdən həmin vaxt Müsavat partiyasını Milli Şurada Tofiq Yaqublu yox, partiyanın başqanı İsa bəy Qənbər təmsil edirdi.

Siyahıda yer alan Qubad bəy İbadoğlu ümumiyyətlə Milli Şuranın nə rəhbər heyətində, nə də üzvlüyündə təmsil olunmayıb, çox hörmətlə Nurəddin Mustafayev isə bu “şanlı məktub” yazılanda Milli Şuranın yox, EL hərəkatının üzvü olub. Şübhəsiz ki, İstanbulda yaşayan professor Kamil Vəli Nərimanoğluna da bu son dərəcə "məxfi" məktubu yəqin xüsusi feld-yeger xidməti ilə göndərib. O səbəbə ki, həzrəti Nuh dövrünün sürətiylə işləyən sadə poçt xidməti ilə getsəydi, türk istiparatının əlinə keçər və uluslararası qalmaqala gətirib çıxarardı. Bundan əlavə o vaxtlar Milli Şuranın aparatına və katibliyinə Eldar Namazov rəhbərlik edirdi. Belə həyati əhəmiyyətli "gizli məktubda" onun imzasının olmaması mümkünsüzdür. Göründüyü kimi mayası saxtakarlıqdan tutulan "gizli məktuba" imza atanların siyahısı belə, bugünkü şərtlərə uyğunlaşdırılıb. Bax belə: başdan ayağa saxtakarlıq.

Ötən yazılarımın birində demişdim 21 illik idarəçiliyi dövründə İlham Əliyev qeyri-neft sektorunda normal bir istehsal müəssisəsi yarada bilmədi, yalnız gecə-gündüz konveyer üsulu ilə yalan üyüdən bir dəyirman yarada bildi. Amma "Milli Şura"nın Rusiya Prezidentinə gizli məktubu” bu dəyirmandan un əvəzinə yarma kimi çıxdı.

Sovet dövründə Mirzə Cəlil “Molla Nəsrəddin” jurnalında tənqid etmək istədiyi Gəncə ukomu (uezd komitəsi) haqqında bir elan vermişdi. Həmin elanda deyilirdi ki, möhtərəm qarelərimiz (oxucularımız) Gəncə ukomu başını itirib, tapan olsa redaksiyamıza gətirsin. Daha sonrakı nömrədə Mirzə elanı təzələyib yazmışdı ki, möhtərəm qarelərimiz (oxucularımız) daha zəhmət çəkib axtarmayın, sən demə ukomun başı yox imiş.