Aqil Hümbətov cəzaçəkmə müəssisəsində tibbi yardım göstərilməməsindən şikayət edir

Xalq Cəbhəsi Partiyasının fəalı Aqil Hümbətovun həyat yoldaşı KİV vasitəsilə həyat yoldaşının saxlanıldığı 2 saylı cəzaçəkmə müəssisəsinin rəhbərliyinə müraciət edib.

Onun sözlərinə görə, Aqil Hümbətovun dişi uğursuz çıxarılıb və o, ağrıdan əziyyət çəkir, amma şikayətlərinə heç kim fikir vermir. O, Aqilə "qəsdən əziyyət edildiyi", "onun siyasi fəallığına görə cəzalandırıldığı" qənaətindədir.

Penitensiar Xidmətdən Turan-a bildiriblər ki, "müalicəyə ehtiyacı olan məhbuslar vaxtlı-vaxtında ixtisaslaşmış tibbi yardım alır".

A.Hümbətov 11 avqust 2021-ci il tarixində saxlanılıb və Bakı Ağır Cinayətlər Məhkəməsi tərəfindən Azərbaycan CM-in 126.1-ci (sağlamlığa qəsdən ağır zərər vurma) maddəsi ilə 10 il müddətinə həbs edilib.

Hümbətov özünü təqsirsiz hesab edir, zərərçəkmişə hücum etmədiyini, müxalif fəaliyyətinə görə siyasi təxribatın qurbanı olduğunu iddia edir. Hüquq müdafiə təşkilatları Hümbətovu siyasi məhbus kimi tanıyıblar.