REAL bələdiyyələrin iqtisadi əsaslarında köklü islahatlar aparılmasını təklif edir

"Respublikaçı Alternativ" Partiyası (REAL) 29 yanvar bələdiyyə seçkiləri ərəfəsində iqtisadi fəaliyyət imkanlarını genişləndirmək məqsədilə yerli hakimiyyət orqanlarında islahatlar proqramı təklif edib.

Yeni proqram ölkədə mövcud iqtisadi problemlər nəzərə alınmaqla işlənib hazırlanıb.

Azərbaycan hökuməti iqtisadi cəhətdən məqsədəuyğunluğu şübhə doğuran layihələri üçün xarici kreditlər almağa çalışır.

Beynəlxalq maliyyə müəssisələri bu kreditləri verməkdə tərəddüd edir, belə ki, Azərbaycanın iqtisadiyyatı hələ "neft-qaz gəlirlərinin eyforiyası" altındadır və onun perspektivləri qaranlıqdır.

REAL xarici kreditlərin yarısını bələdiyyə qiymətli kağızları qarşılığında götürməyi təklif edir. Bunun üçün bir sıra qanunlara dəyişikliklər edilməli və bələdiyyə qiymətli kağızlarının sərbəst birja dövriyyəsi, onların investorlar tərəfindən bazar qiyməti ilə qeyri-məhdud miqdarda alınması mümkünlüyü təmin edilməlidir.

Bu sistem bələdiyyələrin qlobal maliyyə resurslarına çıxış əldə etməsinə və ərazilərin inkişafına vəsait cəlb etməsinə imkan verərdi. Bu, həmçinin regionlar arasında sağlam rəqabətin inkişafına şərait yaradar.

Beləliklə, bələdiyyələr mərkəzləşdirilmiş subsidiyalardan və qrantlardan asılılğını azaldacaq, yerli hakimiyyət isə real iqtisadi subyektlərə çevriləcək.

İslahatların mahiyyəti iqtisadi layihələrin seçiminin siyasi hakimiyyətin maraqlarının deyil, sərbəst bazarın həyata keçirməsindən ibarətdir. Bu, bələdiyyələrin demokratik hesabatlılığını da artıracaq.

Bundan başqa, bu sistem xarici və daxili borc strukturunda mümkün korrupsiyanı azaldar. Bu zaman maliyyələşmə layihələri fəal vətəndaş iştirakı ilə seçiləcək.

Qeyd edilən islahatın həyata keçirilməsinə Avropa Şurasının Yerli və Regional Hakimiyyətlər Konqresi, həm də bu sahədə uzunmüddətli müsbət təcrübəsi olan Türkiyə konsultativ və texniki yardım göstərə bilər.

REAL hesab edir ki, 2025-ci ildə zəruri qanunvericilik bazası hazırlana və 2026-cı ildə onun icrasına başlana bilər.