İlham Əliyev Koreyanın "SK Group" şirkətlər qrupunun sədrini qəbul edib

Bakı/06.11.23/Turan: Noyabrın 6-da Prezident İlham Əliyev Koreya Respublikasının Ticarət və Sənaye Palatasının və "SK Group" şirkətlər qrupunun sədri Çey Tae-von, həmçinin Xorvatiya Respublikasının Baş naziri Andrey Plenkoviç ilə görüşüb.

Prezident Administrasiyasının məlumatına görə, Əliyevin Çey Tae-von ilə görüşündə Azərbaycan ilə Koreya arasında müxtəlif istiqamətlərdə iqtisadi əməkdaşlıq imkanları diqqət mərkəzində olub.

Görüşdə əsasən işğaldan azad edilmiş ərazilərdə "ağıllı şəhər" və "ağıllı kənd" konsepsiyasının tətbiqi ilə bağlı Koreya Respublikası şirkətinin təcrübəsi, Azərbaycanın bərpa olunan enerji potensialının reallaşdırılması, həmçinin ölkənin böyük mineral ehtiyatları, informasiya-kommunikasiya texnologiyaları, təhsil və insan kapitalının inkişafı sahələrində əməkdaşlıq məsələləri müzakirə olunub.

Turizm əlaqələrinin genişləndirilməsi ilə bağlı da fikir mübadiləsi aparılıb.

1953-cü ildə təsis olunan və baş ofisi Seul şəhərində yerləşən "SK Group" Koreya Respublikasının ikinci ən böyük şirkətlər qrupudur. Şirkətin ötən ilki gəliri 150,9 milyard, aktivlərinin həcmi isə 246,9 milyard ABŞ dollarıdır. Qlobal miqyasda törəmə şirkətlərinin və filiallarının sayı 512, dünya üzrə əlaqəli şirkətlərinin sayı isə 198 olan “SK Group”un müxtəlif ölkələrdə 100 mindən çox işçisi var. Şirkət energetika və kimya, informasiya-kommunikasiya texnologiyaları, yarımkeçiricilər və qabaqcıl materiallar, logistika, xidmətlər, biosəhiyyə və əczaçılıq istiqamətlərində fəaliyyət göstərir. 0