İlin sonunda Sankt-Peterburqda Əliyev-Paşinyan görüşü keçirilə bilər

Bakı/07.12.22/Turan: Dekabrın sonuna qədər Ermənistan və Azərbaycan liderlərinin görüşü keçirilə bilər. Bu barədə çərşənbə günü Ermənistan parlamentinin spikeri Alen Simonyan jurnalistlərə bildirib.

Ermənistanın Azərbaycanın görüşdə Fransa prezidenti Makronun iştirak etməyəcəyi barədə tələbi ilə razılaşıb-razılaşmadığı haqqında suala cavabda Simonyan deyib ki, onda görüşün yeri haqqında məlumat yoxdur. O, əlavə edib ki, görüşlərin Brüsseldə keçirilməsi mütləq deyil.

"Biz istənilən məzmunlu müzakirəyə hazırıq. Bilirsiniz ki, dünən baş nazir müavinlərinin görüşü keçirilib, növbəti görüş haqqında da razılıq əldə olunub", deyə Simonyan əlavə edib.

Göründüyü qədər, Əliyevin Paşinyanla görüşü Rusiyada keçiriləcək. Rusiya prezidentinin mətbuat katibi Peskovun bugünki bəyanatı bunun dolayı təsdiqi olub.

"Rusiya, şübhəsiz, bu görüşün öz ərazisində keçirilməsi üçün lazımi köməkliyi göstərməyə hazır olacaq", deyə TASS agentliyi Peskovdan sitat gətirir. O, görüşün dekabrın sonlarında Sankt-Peterburqda keçirilə biləcəyinə eyham edib.

"Bu görüşü Yeni İlə qədər keçirmək fikri var. Bütün hazırlıqlar başa çatan kimi biz müvafiq açıqlamanı verəcəyik. Əliyev-Paşinyan görüşü ilə bağlı qarşılıqlı anlaşma olsa, məlumat verəcəyik", deyə Peskov jurnalistlərə bildirib.

Xatırladaq ki, Əliyev-Paşinyan görüşünün dekabrın 7-də Brüsseldə Avropa Şurasının rəhbəri Şarl Mişelin vasitəçiliyi ilə keçirilməsi nəzərdə tutulmuşdu. Amma bir neçə gün əvvəl Paşinyan bildirdi ki, yalnız Fransa prezidenti də iştirak edərsə görüşə gedəcək. Amma İlham Əliyev bunun razılaşmanı pozduğunu və Makronla Qarabağ problemini müzakirə etmək niyyətində olmadığını deyib. 02D