İqbal Əbilovun atası onun Ermənistan xüsusi xidmət orqanları ilə əlaqələrini təkzib edib

Talış tədqiqatçısı İqbal Əbilov erməni kəşfiyyatı ilə əməkdaşlıq edərək dövlətə xəyanətdə ittiham olunur. Bu barədə Azərbaycanın bir sıra KİV-lərinin iyulun 24-də Əbilovu 4 ay müddətinə həbs edən Səbail Rayon Məhkəməsinin iclasına istinadən yaydığı məlumatda deyilir.

Məlumatlarda Əbilovun “Azərbaycan Dövlət Təhlükəsizliyi Xidmətinin (DTX) həyata keçirdiyi xüsusi əməliyyat tədbirləri nəticəsində” saxlanıldığını yazılır.

O, üçüncü ölkə ərazisində məskunlaşıb Ermənistan xüsusi xidmət orqanı nümayəndələrinin tapşırıqlarının icrasını həyata keçirməklə dövlətə xəyanət etməkdə, onlarla razılaşdırılmış qaydada Azərbaycan Respublikası ərazisində etnik zəmində nifrət və düşmənçiliyin salınmasına yönələn hərəkətlər etməkdə təqsirləndirilir.

İddia edilir ki, məhkəmə prosesində digər dəlillərlə yanaşı İqbal Əbilovun Yerevan Dövlət Universitetinin Şərqşünaslıq kafedrasının rəhbəri və Ermənistanda fəaliyyət göstərən Şərqşünaslıq İnstitutunun direktoru - Ermənistan xüsusi xidmət orqanlarının nəzarətində Azərbaycanın ərazi bütövlüyü əleyhinə məqsədyönlü iş aparan Asatrian Garnik Seroboviç ilə SKYPE vasitəsilə apardığı gizli danışıqlar və sövdələşmələri də elan edilib.

Həmin mənbələrə əsasən, Əbilovun xarici xüsusi xidmət orqanlarının nümayəndələri ilə birgə müxtəlif ölkələrdə olan pozucu qüvvələri cəlb etməklə Azərbaycanın ərazi bütövlüyü əleyhinə qondarma təşkilatın fəaliyyətini təşkil etməsinə, həmçinin Ermənistan xüsusi xidmət orqanları ilə əlaqəli Vardan Voskanyan və digərlərinin ölkəmizə qarşı düşmənçilik fəaliyyəti həyata keçirməsinə kömək etməsinə də şübhələr var.

Əbilova Azərbaycan Respublikası Cinayət Məcəlləsinin 274 (dövlətə xəyanət), 281.3 (xarici təşkilatların və onların nümayəndələrinin tapşırığı ilə dövlət əleyhinə yönələn açıq çağırışlar) və 283.1-ci (milli nifrət və düşmənçiliyin salınmasına yönələn hərəkətlər) maddələri ilə ittiham elan olunub.

Qeyd edək ki, Dövlət Təhlükəsizlik Xidməti Əbilovun işinə rəsmi münasibət bildirməyib. Bundan başqa, həbs-qətimkan tədbirinin seçilməsi ilə bağlı məhkəmə prosesi jurnalistlərin və yaxınlarının iştirakı olmadan bağlı qapılar arxasında keçirilib. Öz növbəsində İqbal Əbilovun atası oğlunun Ermənistan xüsusi xidmət orqanları ilə əməkdaşlıq etməsi ilə bağlı deyilənləri yalan adlandırıb.

Onun sözlərinə görə, İ.Əbilov həqiqətən də Qarnik Asatryanla əlaqə saxlayıb, lakin bunlar sırf elmi əlaqələr olub.

“Bu, iki şərqşünasın ünsiyyəti idi”, - deyə Şahin Əbilov vurğulayıb.

O, qapalı məhkəmə prosesinin materiallarının mediaya sızmasından təəccübləndiyini bildirib.

“Bizə cinayət işinin məzmunu və məhkəmədə baş verənlər barədə danışmaq qadağandır, eyni zamanda mətbuatda oğluma qarşı ittihamlarla təhrif olunmuş məlumatlar yer alır. Biz bunu ictimaiyyəti çaşdırmaq və oğlumun həbsinə haqq qazandırmaq cəhdi kimi qiymətləndiririk”, - deyə Ş.Əbilov bildirib.