İqtisadi Şuranın əsasnaməsi təsdiqlənib

Bakı/12.02.21/Turan: Fevralın 12-də dövlət başçısı İlham Əliyev ölkənin İqtisadi Şurası haqqında əsasnaməni təsdiq edib.

Bu qurum prezidentin  9 sentyabr 2020-ci il tarixli fərmanı ilə yaradılıb. Məqsəd ölkədə makroiqtisadi və maliyyə sabitliyinin möhkəmləndirilməsi, iqtisadi artımın və sosial rifahın yüksəldilməsi, bu sahələrdə koordinasiya olunmuş siyasətin həyata keçirilməsi, habelə səmərəli tənzimləmə və hüquqtətbiqetmə praktikasına nail olunmasıdır.

İqtisadi Şura sözügedən məqsədlərə nail olunması üçün təkliflərini ildə iki dəfə prezidentə təqdim etməlidir.

İqtisadi Şuraya baş nazir Əli Əsədov rəhbərlik edir. Quruma prezidentin köməkçiləri Şahmar Mövsümov və Natiq Əmirov, birinci vitse-prezidentin köməkçiləri Emin Hüseynov və Xalid Əhədov, nazirlər: iqtisadiyyat - Mikayıl Cabbarov, maliyyə - Samir Şərifov, əmək və əhalinin sosial müdafiəsi - Sahil Babayev, Mərkəzi Bankın sədri Elman Rüstəmov, Dövlət Neft Fondunun icraçı direktoru İsrafil Məmmədov daxildir.

İqtisadi Şura əvvəllər mövcud olmuş Maliyyə Sabitliyi Şurasını əvəz edib.–06D-