İranın Ermənistandakı səfiri: Ermənistanın maraqları İranın, İranın maraqları da Ermənistanın maraqlarıdır

Yerevan/12.02.13/Turan-Armİnfo: Ermənistan və İran strateji münasibətləri inkişaf etdirir, Ermənistanın maraqları İranın, İranın maraqları isə Ermənistanın maraqlarıdır, deyə İranın Ermənistandakı səfiri Məhəmməd Rəisi bugünki mətbuat konfransında bildirib.

Diplomat xatırladıb ki, İranda ixracı qadağan olan məhsullar siyahısı təsdiq edilib, buna baxmayaraq, bu malların bəziləri Ermənistana ixrac edilir. Bu hal ikitərəfli əməkdaşlığın real səviyyəsini əyani şəkildə nümayiş etdirir.

Rəisinin sözlərinə görə, Yerevan və Tehran arasında sıx əlaqələr çoxları üçün nümunə ola bilər. Rəisi həmçinin əlavə edib ki, bir sıra mühüm layihələrin həyata keçirilməsinə şərait yaratmağı öz borcu bilir. Ölkələr arasında artıq bu layihələr haqqında sazişlər imzalanıb. Səfir İran-Ermənistan dəmir yolunun tikintisi layihəsinin həyata keçirilməsinin əhəmiyyətini qeyd edib. -02D-