İstintaq Təcridxanasında əlil fəalın vəziyyəti pisləşib

1 saylı Bakı İstintaq Təcridxanasında birinci qrup əlil fəal Famil Xəlilovun vəziyyəti pisləşib. Ona yaxınları ilə görüş vermirlər, bu barədə fəalın həyat yoldaşı Kiçikxanım Xəlilova bildirib.

Xəlilov ailəsi ilə yalnız telefonla əlaqə saxlaya bilir.

Bu gün o, həyat yoldaşına zəng edib və gecə vəziyyətinin pisləşdiyini bildirib. O, 8 nəfər məhbusla bir kamerada saxlanılır.

Gecə onun temperaturu yüksəlib və bədənində ağrılar başlayıb. Əllərində və qulaqlarında çürümə prosesi gedir", deyən həyat yoldaşı sanitar hissədə ona heç bir yardım göstərilmədiyini qeyd edib.

Ədliyyə nazirliyinin  Baş Tibb İdarəsindən şərh almaq mümkün olmayıb.

* Xəlilov bir il əvvəl İsveçdən deportasiya olunub və tibbi yardımdan məhrum olub. Qollarının iflic olmasına baxmayaraq, Xəlilov sosial şəbəkələrdə fəal idi və kompüterdə ayaq barmaqları ilə yazırdı. O, hakimiyyəti tənqid edirdi və etiraz aksiyalarında iştiraka çağırırdı.

Xəlilov mayın 4-də saxlanılıb. Qolları iflic olan fəala qarşı CM-in 234.4.3-cü (külli miqdarda narkotik vasitənin qanunsuz dövriyyəsi) maddəsi ilə ittiham irəli sürülüb. Onu 12 ilədək azadlıqdan məhrumetmə cəzası gözləyir.