Karantin rejimi sərtləşdirilir

Bakı/04.06.20/Turan: 6 iyun saat 00.00-dan etibarən 8 iyun 06:00-a qədər Bakı, Sumqayıt, Gəncə, Lənkəran şəhərlərində və Abşeron rayonunda sərt karantin rejimi tətbiq edilir. Bu barədə bu gün baş nazirin müavini Əli Əsədov bildirib.

Onun sərəncamına əsasən, bu dövrdə Bakı, Sumqayıt, Gəncə, Lənkəran şəhərlərində və Abşeron rayonunda ticarət istisna olmaqla, bütün fəaliyyətlər, xidmətlər dayandırılır.

Xəstəxanaların və təcili tibbi yardım şöbələrinin, sosial xidmət müəssisələrinin, habelə xüsusi qayğıya olanlar üçün baxıcılıq xidmətinin fəaliyyəti istisna təşkil edəcək.

Qadağa kommunal xidmətlər, elektrik enerjisinin istehsalı və təchizatı müəssisələrinə, rabitə xidmətləri, teleradioyayım xidmətlərinə (kabel televiziyaları daxil olmaqla), dəmir yolu, avtomobil, dəniz və hava nəqliyyatı ilə yük daşımalarına, boru kəmərləri ilə nəqliyyatın təmin edilməsi fəaliyyəti, fasiləsiz istehsalat fəaliyyəti, neft və qazın hasilatı, emalı, saxlanması və satışı, haelə fəaliyyəti dayandırılmış iş və xidmət sahələrinin mühafizə və texniki təhlükəsizliyinin təmin edilməsi üzrə xidmətlərə də şamil edilmir.

Qeyd edilən sahələrdə işləyən şəxslər istisna olmaqla, qalan şəxslərin yaşayış yerini tərk etməsi qadağan edilir.

Sakinlər yaşayış yerlərini və ya olduğu yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə, habelə yaxın qohumların dəfnində iştirak etmək üçün Azərbaycan Respublikasının Daxili İşlər Nazirliyinin Növbətçi Hissələri İdarəetmə Xidmətinin 102 Xidməti - Zəng Mərkəzi vasitəsilə icazə almaqla tərk edə bilər.

Xüsusi təyinatlı, qəza-bərpa, təcili tibbi yardım avtomobillərinin və fəaliyyətinə icazə verilən orqanların (qurumların) və təşkilatların xidməti avtomobillərinin hərəkəti istisna olmaqla, ictimai nəqliyyatın və avtomobillərin hərəkəti dayandırılacaq.

Fəaliyyətinə icazə verilən iş və xidmət sahələrində işləyən şəxslərin və xidməti avtomobillərin hərəkətinə işəgötürən tərəfindən həmin şəxslər barədə məlumatlar elektron imzadan istifadə edilməklə icaze.e-gov.az portalına daxil edildikdən sonra yol veriləcək.

Xüsusi karantin rejiminin tələblərinin pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyır. Sərəncamın icrasına nəzarət DİN-ə tapşırılır.

Növbəti iki həftə də bu məhdudiyyətlərin tətbiq ediləcəyi gözlənilir. -06D-