Kəlbəcərdə dinc sakinlərin kütləvi dəfn olunduğu yer aşkar edilib

Bakı/26.04.21/Turan: Azərbaycan Baş Prokurorluğu bazar ertəsi 1993-cü ilin aprelində Kəlbəcərin işğalı zamanı erməni işğalçılar tərəfindən qətl edilmiş Kəlbəcər rayonunun Başlıbel kəndinin dinc sakinlərinin kütləvi dəfn olunduğu yerin aşkar edildiyi barədə məlumat yayıb.

259 fərdi yaşayış evi və 2 minə yaxın əhalisi olan bu kənd 3 aprel 1993-cü il tarixində ermənilər tərəfindən işğal edilib. Dinc sakinlər qaçaraq canlarını qurtarıblar, amma 62 yaşlı insan və uşaq qaça bilməyib və kəndin yaxınlığındakı mağaralarda gizlənib. Bütün rayon işğal edilib, mühasirəyə düşən insanlar aprelin 18-də ermənilər onları aşkar edənə qədər mağaralarda gizləniblər. İşğalçılar ikisi uşaq olmaqla, 12 nəfəri öldürüb və 14 nəfəri girov götürüb. Digərləri qaçmağa və canlarını qurtarmağa müvəffəq olublar. Bir neçə gün sonra qaçan şəxslər gecə qayıdaraq həmyerlilərini dəfn ediblər.

Azərbaycan Baş Prokurorluğu dəfn yerində ekshümasiya həyata keçirib və qətl edilən şəxslərin cəsədlərini tapıb. DNT təhlili və bu şəxslərin kimliklərinin müəyyən edilməsi üçün nümunələr götürülüb. Zəruri istintaq hərəkətləri və cinayətin şahidlərinin dindirilməsi davam etdirilir.

* Azərbaycanın Kəlbəcər rayonu 1993-cü il aprelin əvvəllərində gedən döyüşlər zamanı işğal edilib. 60 min sakin qaçqın düşüb, yüzlərlə insan öldürülüb və dağlarda soyuqdan ölüb.

Erməni işğalçıların silahlı qüvvələrinə məşhur terrorçu Monte Melkonyan komdandanlıq edirdi, Dağlıq Qarabağın Martuni qəsəbəsində onun abidəsi hələ də qalmaqdadır. -02D-