Kəşfiyyatçı peyk Azərbaycana nə verir?

Azərbaycanın öz kəşfiyyatçı peykini buraxması ölkənin potensialının və texniki kəşfiyyat sisteminin möhkəmləndirilməsində mühüm mərhələdir. Hərbi ekspertlərin ortaq fikri belədir. Texniki kəşfiyyat sahəsində keçmiş zabitlərdən biri anonim qalmaq şərtilə bildirib ki, bundan sonra Azərbaycan kosmik kəşfiyyat məlumatları məsələlərində praktiki olaraq, müstəqil oldu.

Belə ki, indiyədək belə məlumatlar ABŞ, Rusiya, Türkiyə və ya kəşfiyyatçı peyki olan başqa ölkədən daxil ola bilirdi. Bundan sonra belə bir ehtiyac yoxdur və xüsusən, peyki buraxan Fransa şirkətinin məlumatına inansaq, Bakıdan yer üzündə baş verənləri real vaxt rejimində izləmək olacaq. “Aydındır ki, söhbət cəbhə xəttində, Qarabağda döyüş əməliyyatları zonasında və Ermənistanla sərhəddə vəziyyətdən gedir. Həmçinin, indi Azərbaycan üçün Ermənistanın özünün ərazisi də məxfi deyil”, deyə ekspert qeyd edib.

Bu sistem yaxşı sazlanarsa və yerüstü qüvvələrlə (artilleriya, aviasiya, xüsusi təyinatlılar və s.) dəqiq qarşılıqlı fəaliyyət təmin edilərsə, hərbi potensialı və adi hərbi qüvvələrin və vasitələrin tətbiqinin səmərəliliyini xeyli gücləndirə bilər.

Məsələn, əvvəllər düşmən qüvvələrinin və vasitələrinin yeri və hərəkəti haqqında məlumatları radiotutucu, kəşfiyyat qruplarının göndərilməsi vasitəsilə və ya casusluq yolu ilə müəyyən etmək olurdusa, indi bütün bunlar kosmosdan görünəcək.

“Bundan sonra alınmış məlumatlardan düzgün və vaxtlı-vaxtında istifadə etmək mühüm vəzifəyə çevriləcək. Bu zaman düşmənin dezinformasiya üçün mühüm manevri yaranır”, deyə ekspert qeyd edib.

Lakin bu peyk təkcə Qarabağda və Ermənistandakı vəziyyətə deyil, həm də Xəzərdə, qonşu ölkələrin ərazilərindəki vəziyyətə nəzarət etməyə imkan verir.

Qeyd edək ki, bu qış Turanın müxbiri Tuluza şəhərində Arianspace müəssisəsində olmağa müvəffəq olub. Burada bir qrup Azərbaycanlı jurnalistə kəşfiyyatçı peyklərin imkanları nümayiş etdirilib. Məsələn, yüzlərcə kilometr yüksəklikdən futbol maçını televizorda olduğu kimi izləməyə imkan verən foto və videokadrlar göstərilib.

Amma ən təsirlisi o idi ki, peykdən yeraltı obyektlər və binaların damlarının altında olanlar da görünürdü. Həmin vaxt şirkət nümayəndəsi bildirmişdi ki, kəşfiyyatçı peykin imkanları bununla məhdudlaşmır. -02В-