Lavrov: “Azərbaycan İranın sərhəddə təlim keçirməsindən narazıdır”

Bakı/06.10.21/Turan: Oktyabrın 6-da Moskvada Rusiya və İran xarici işlər nazirlərinin  görüşündə Cənubi Qafqazda vəziyyət müzakirə mövzularından biri olub.

"Biz bir sıra regional problemləri, o cümlədən "Xəzər beşliyi" çərçivəsində əməkdaşlığı, Xəzərin hüquqi statusu haqqında Konvensiyanın ratifikasiyasının təmin edilməsini nəzərdən keçirdik. Zaqafqaziyada, Yaxın Şərqdə və Şimali Afrikada vəziyyəti müzakirə etdik", - deyə Rusiya  Xarici İşlər Nazirliyinin rəhbəri Lavrov görüşün sonunda keçirdiyi brifinqdə bildirib.

 Öz növbəsində əmir Abdullahian daha səmimi olub. "Bizim Cənubi Qafqaz və regionda vəziyyətlə bağlı narahatlığımız var. Biz İranla bir qonşu arasındakı münasibətlərə dair bəyanatlardan razı deyilik. Biz regionda geosiyasi vəziyyətin dəyişməsini və sionistlərin mövcudluğunu qəbul etməyəcəyik. Qonşulara ünvanladığımız məktub dostluq mesajıdır", -  o bildirib.

"Azərbaycanın xarici qüvvələrlə daimi hərbi təlimləri təxribatdır", - Abdullahian deyib.

Bu qarışıq ifadədən belə nəticə çıxarmaq olar ki, İran Azərbaycana münasibətdə öz mövqeyində qalır və onu dəyişmək niyyətində deyil.

 İranlı jurnalistlərdən biri Lavrovdan Rusiyanın Azərbaycanın "təxribatları"na, Bakının "Türkiyə və Pakistanın timsalında xarici qüvvələri regiona gətirmək və Xəzərdə xarici qüvvələrin iştirakını hazırlamaq” cəhdlərinə münasibəti barədə soruşub.

Lavrov birbaşa cavabdan yayınıb, amma qeyd edib ki, Rusiya kommunikasiyaların açılmasına tərəfdardır, İran da daxil olmaqla, hamı bundan faydalanacaq.

O həmçinin deyib ki, Rusiya regiona xarici müdaxilənin, gərginliyin artmasının və hərbi təlimlərin əleyhinədir. " Azərbaycan da bu yaxınlarda İranın sərhəddə keçirdiyi hərbi təlimlərilə bağlı narahatlığını bildirib", - Lavrov qeyd edib.

Xəzərə gəlincə, onun hüquqi statusu xarici hərbi iştirakı qadağan edir. Lakin bu status son Xəzəryanı ölkə, yəni İran konvensiyanı ratifikasiya etdiyi zaman qüvvəyə minə bilər.

Öz növbəsində, Abdullahian deyib ki, İranın ancaq bir dəfə təlim keçirib, Azərbaycan isə xarici qüvvələrlə altı təlim keçirib. O bunu  "təxribat"kimi qiymətləndirib.-02D-