Lavrov BMT TŞ-nin Qarabağ üzrə qətnamələrini təhrif edib – T.Zülfüqarov

RF XİN rəhbəri Sergey Lavrovun Qarabağ münaqişəsinin Azərbaycanın daxili işi olmadığı haqqında ifadələri təəccüb doğurur, deyə Azərbaycanın keçmiş xarici işlər naziri Tofiq Zülfüqarov bildirib.

““Biz suveren ölkə kimi ölkəmizi, torpaqlarımızı qorumaq hüququna malik deyilik? Bu nə deməkdir? Rusiya bu hüquqa malik idi, öz ərazi bütövlüyünü Çeçenistanda təmin etdi, ancaq bizim belə hüququmuz yoxdur?”, deyə Zülfüqarov “Azadlıq” radiosuna bildirib.

Azərbaycan BMT-nin digər üzvləri kimi öz suverenliyini qoruya və bunun üçün zəruri addımları ata bilər. Buna görə Zülfüqarov Lavrovun çıxışını “ermənipərəst” adlandırıb.

Rusiya XİN rəhbəri ilk dəfə bildirib ki, torpaqların azad edilməsi və Dağlıq Qarabağın statusunun müəyyən edilməsi eyni zamanda həll olunmalıdır. Zülfüqarovun fikrincə, Lavrov BMT TŞ-nin qətnamələrinə istinad edərkən onları yanlış şərh edir.

“Həmin qətnamələrdə məsələ onun dediyi şəkildə qoyulmayıb. Əksinə, işğaldakı torpaqların azad edilməsi, yalnız bundan sonra statusun həlli tələb olunur”, deyə Zülfüqarov bildirib.

O, həmçinin Lavrovun substantiv danışıqlar mövzusuna toxunmadığına diqqət çəkib.

“Keçən il həm Rusiya, həm də Azərbaycan rəsmiləri deyirdilər ki, artıq substanstiv, yəni konkret mövzulara aid konkret danışıqların vaxtı gəlib çatıb. Azərbaycan tərəf dəfələrlə real danışıqları gözlədiyini bəyan edib. Amma bu haqda Lavrov bir kəlmə də deməyib”, deyə Zülfüqarov qeyd edib. -06D-