Lənkəranın sabiq icra başçısının müavini məhkəmə qarşısına çıxarılacaq

Bakı/23.08.22/Turan: Lənkəran Rayon Prokurorluğunda Rayon İcra Hakimiyyəti başçısının keçmiş müavini Rəsili Arifqızına qarşı ibtidai istintaq başa çatıb.

Prokurorluqdan bildirilib ki, Arifqızının Lənkəran şəhər 4 saylı liseyin 9-cu sinif şagirdinə qarşı fiziki zorakılıq törətməsi faktı ilə bağlı cinayət işi başlanıb.

İstintaq müəyyən edib ki, Arifqızı bu il iyulun 14-də İ. tələbəni arayış vermək adı ilə evinə çağırıb və səlahiyyətlərini aşaraq yeniyetmənin mobil telefonunu əlindən alıb. Daha sonra o, şəxsi məlumatlarını qızın qohumlarının nömrələrinə göndərib. Bundan başqa, Arifqızı yeniyetməyə sağlamlığa zərər vurmayan bədən xəsarətləri yetirib.

Toplanmış materiallar əsasında Arifqızına Cinayət Məcəlləsinin 309.1-ci (vəzifə səlahiyyətlərindən sui-istifadə) maddəsi ilə ittiham irəli sürülüb və cinayət işi Lənkəran Rayon Məhkəməsinə verilib.

Mətbuatda yayılan məlumata görə, Arifqızı hadisəni bununla əsaslandırıb ki, zərərçəkmiş qızının və sinifdəki digər şagirdlərin adından oğlanlara mesajlar yazıb. Lakin zərərçəkənin anası bu iddiaları təkzib edib.

Bu naddə ilə keçmiş vəzifəli şəxs müəyyən vəzifə tutma hüququndan məhrum edilməklə iki min manatdan dörd min manatadək miqdarda cərimə və ya iki ilədək müddətə islah işləri və ya üç ilədək müddətə azadlıqdan məhrum etmə ilə cəzalandırılır.—06B-