Leyla Yunus barəsində 3 aylıq həbs-qətimkan tədbiri seçilib. YENİLƏNİB-video (YENİLƏNİB)

Nəsimi rayon Məhkəməsinin qərarı ilə Leyla Yunus barəsində 3 aylıq həbs-qətimkan tədbiri seçilib.

2014 İyul 30 (Çərşənbə) 18:34:07

6 saatlıq dindirmədən sonra saat 18:10-da Sülh və Demokratiya İnstitutunun direktoru Leyla Yunus Baş Prokurorluun Ağır Cinayətlər üzrə İstintaq İdarəsinin binasından çıxarılaraq qara maşınla aparılıb. Maşın böyük sürətlə naməlum istiqamətə hərəkət edib, bu barədə Turan-ın müxbiri hadisə yerindən bildirib.

Xatırladaq ki, Yunus bu gün saat 11:45-də saxlanılıb.

Onun həyat yoldaşı Arif Yunus Prokurorluğun İstintaq İdarəsinin binasındadır.

İndicə məlum olub ki, Leyla Yunusa qarşı dövlətə xəyanət (274-cü maddə), vergi ödənişindən yayınma (213-cü maddə), qanunsuz sahibkarlıq (192-ci maddə), sənədlrin saxtalaşdırılması (320-ci maddə), böyük ölçüdə fırıldaqçılıq (178.3.2) ittihamlar irəli sürülüb.

Leyla Yunus həbs qətimkan tədbirinin seçilməsi üçün Nəsimi rayon məhkəməsinə aparılıb.

Arif Yunus barəsində polis nəzarətinə verilmə qətimkan tədbiri seçilib. Ona qarşı 274 və 178.3.2-ci maddələrlə ittiham irəli sürülüb. Bu barədə Turan-a vəkil Cavad Cavadov bildirib. Onun sözlərinə görə, Yunuslar onlara qarşı irəli sürülmüş ittihamları rədd ediblər. -16C-

2014 İyul 30 (Çərşənbə) 13:13:08

Leyla Yunus Baş Prokurorluğun Ağır Cinayətlər üzrə İstintaq İdarəsinə aparılıb. Bu barədə Turan-a Arif və Leyla Yunusların nümayəndəsi Yusif Ağayev bildirib.

Baş Prokurorluğun İstintaq İdarəsinin rəhbəri İbrahim Ləmbəranski onun istintaq hərəkətlərində iştirakına etiraz edərək bunu yalnız vəkilin edə biləcəyini bildirib.

Bu, belə düşünməyə əsas verir ki, L.Yunusa qarşı ittiham irəli sürmək istəyirlər.

Eyni zamanda o istisna etmir ki, L.Yunusun bu gün saxlanması ifadə verməkdən imtina etməsi ilə əlaqədar məcburi gətirilməsidir.

A.Yunus bildirib ki, mənzilləri polis tərəfindən əhatəyə alındığına və polis qapını sındırmaq istədyinə görə o, “təslim olmaq” qərarına gəıib və ifadə vermək üçün öz vəkili ilə Baş   Prokurorluğa gedəcək. “Çox güman ki, bizi həbs edəcəklər”, - A.Yunus telefonla Turan-ın müxbirinə bildirib.—06C-

2014 İyul 30 (Çərşənbə) 12:20:22

Saat 11:45-də hüquq müdafiəçisi Leyla Yunus evinin yaxınlığında saxlanılıb. Bu barədə onun həyat yoldaşı Arif Yunusov bildirib.

“Leyla evdən çıxdı, RATİ-yə konfransa gedəcəkdi. Onun getdiyi maşına elə həyətdə hücum olub. Üç nəfər mülki geyimli şəxs maşını dayandırıb və onu aparıb. Nə Leyla xanım, nə də sürücüsü zənglərə cavab vermir. Görünür, onlar Baş Prokurorluğun əməkdaşlarıdır”, - A.Yunus bildirib.

Öz növbəsində hüquq müdafiçisi Yusif Ağayev bildirib ki, saxlanmanın səbəblərini öyrənmək üçün prokurorluğun müstəntiqi İbrahim Ləmbəranskiyə telefon edir, lakin zəng çatmır.

Saat 12.00-a yaxın A.Yunus bildirib ki, altı nəfər yaşadıqları mənzilin qapısını döyür və qapını sındıracaqları ilə hədələyir. A.Yunus telefon zənglərinə cavab vermir.—06D--