Lui Okamponun hesabatı qərəzlidir və reallığı əks etdirmir - Hikmət Hacıyev

Bakı/10.08.23/Turan: Beynəlxalq Cinayət Məhkəməsinin birinci prokuroru Lui Okamponun məruzəsində Azərbaycana qarşı əsassız iddia və ittihamlar yer alıb. Bu barədə Azərbaycan Prezidentinin köməkçisi Hikmət Hacıyevin Qarabağ ermənilərinin “soyqırımı” təhlükəsini elan edən Okamponun gəldiyi nəticə ilə bağlı şərhində deyilir.

Okampo hesabatı qərəzlidir və real vəziyyəti təhrif edir, ciddi faktiki və hüquqi səhvləri ehtiva edir. Okampo Qarabağı “mübahisəli ərazi” kimi qələmə verərək Beynəlxalq Məhkəmənin qərarlarını bilərəkdən təhrif edir, halbuki Ermənistan Qarabağı Azərbaycanın tərkib hissəsi kimi tanıyıb.

Okampo Ermənistanın 30 ildir davam edən hərbi təcavüzü və Azərbaycan ərazilərini işğalı ilə bağlı susur. Bundan əlavə, o, işğalçı kimi Ermənistanın məsuliyyətinə göz yumur və etnik təmizləməyə məruz qalmış bir milyon azərbaycanlının acınacaqlı vəziyyətinə susur.

Öz sərhədində nəzarət-buraxılış məntəqəsinin yaradılması Azərbaycanın suveren hüququdur və Ermənistandan qaçaqmalçılıq yolu ilə hərbi texnika və şəxsi heyətin tədarükünü dayandırmaq məqsədi güdür. 

Vətəndaş reinteqrasiyası prosesi çərçivəsində Azərbaycan  Laçın yolu ilə yanaşı, bütün nəqliyyat növləri üçün Ağdam-Xankindi yolundan istifadə etməyi təklif edib. Bu təklif beynəlxalq ictimaiyyət tərəfindən dəstəkləndi.

Azərbaycan Qarabağ bölgəsindəki ermənilərin nümayəndələrini də dialoqa dəvət edib, lakin görünür, onlar qanunsuz marionet rejimin girovluğundadırlar.

Separatçılar dinc siyasi gündəmi dəstəkləmək əvəzinə, siyasi manipulyasiya, “humanitar böhranlar” imitasiyası, dezinformasiya və dinc təşəbbüsləri alt-üst etmək yolunu seçiblər. Qarabağda aclıqla bağlı deyilənlər həqiqətə uyğun deyil və sosial şəbəkələrdə və mediada erməni istifadəçilərin yüzlərlə foto və video faktları ilə asanlıqla təkzib olunur.

"Azərbaycan öz Konstitusiyasına uyğun olaraq Cənubi Qafqaz regionunda davamlı sülhün bərqərar olması və Qarabağ bölgəsində yaşayan ermənilərin reinteqrasiyası, hüquq, təhlükəsizliyi və öhdəliklərinin təmin edilməsi istiqamətində ardıcıl səylərini davam etdirəcək", - Hacıyev bildirib.

O, xarici mətbuata istinadən xəbər Okamponun Beynəlxalq Cinayət Məhkəməsində baş prokuror vəzifəsində çalışarkən dünyanın ən məşhur vergi cənnətində bir neçə şirkəti idarə etdiyinə də diqqət çəkib. Əvvəllər isə o, İrəvanda Xocalı soyqırımının iştirakçısı, Ermənistanın keçmiş prezidenti Serj Sərkisyanla görüşüb. 06B