“Lukoil” “Naxçıvan” və “Qoşadaş” yataqlarının işlənməsində iştirak edəcək

Bakı/22.01.20/Turan: Rusiyanın “Lukoil” şirkəti Azərbaycanın “Naxçıvan” və “Qoşadaş” yataqlarının işlənməsində iştirak edəcək. Bu barədə qərar yanvarın 21-də Davosda Azərbaycan prezidenti İlham Əliyevin “Lukoil” şirkətinin rəhbəri Vahid Ələkbərov ilə görüşü zamanı qəbul edilib.

“Naxçıvan” və “Qoşadaş” perspektiv blokları Xəzər dənizində Abşeron yarımadasının 15-30 km. şimalında yerləşir. Mürəkkəb geoloji struktura malikdirlər.

2000-ci illərin əvvəlində ABŞ-ın “Exxon” şirkəti kəşfiyyat quyusunu qazmışdı, ancaq sənaye neft ehtiyatı aşkar edilməmişdi. Lakin ən yeni texnologiyalar bu strukturun dərin qatlarından neft çıxarmağa imkan verir.

2018-ci ildə “Rosneft” şirkəti ilə “Qoşadaş” bloku üzrə memorandum imzalanıb, ancaq iş bundan irəliyə getməyib.

“Rosneft”dən fərqli olaraq, “Lukoil” dənizdə kəşfiyyat və hasilat sahəsində böyük təcrübəyə malikdir və bu perspektivli strukturlarla maraqlanır.–06D-