Maliyyə Bazarlarına Nəzarət Palatasına Rüfət Aslanlı rəhbərlik edəcək

Prezident İlham Əliyevin sərəncamı ilə Rüfət Aslanlı Maliyyə Bazarlarına Nəzarət Palatası publik hüquqi şəxsin Direktorlar Şurasının sədri təyin edilib.

R.Aslanlı 1970-ci ildə Bakıda anadan olub. Azərbaycan Dövlət Universitetini bitirib. 1995-2007-ci illərdə Azərbaycan Mərkəzi Bankında çalışıb, o cümlədən baş direktor və İdarə Heyəti sədrinin müavini vəzifələrində çalışıb.

2008-ci ilin noyabrında R.Aslanlı Qiymətli Kağızlar üzrə Dövlət  Komitəsinin sədri təyin edilib.

2016-cı ilin fevralında Maliyyə Bazarlarına Nəzarət Palatasının yaradılması üzrə işçi qrupun rəhbəri təyin edilib.

Palata qiymətli kağızlar bazarı, investisiya fondları, sığorta, kredit təşkilatları (bank, bank olmayan kredit təşkilatları və poçt rabitəsinin operatoru) və ödəniş sistemləri fəaliyyətinin lisenziyalaşdırılması, tənzimlənməsi və nəzarəti, habelə cinayət yolu ilə əldə edilmiş pul vəsaitlərinin və ya digər əmlakın leqallaşdırılması və terrorçuluğun maliyyələşdirilməsinin qarşısının alınması sahəsində nəzarət sisteminin təkmilləşdirilməsini, həmçinin bu sahələr üzrə nəzarət sisteminin şəffaflığını və çevikliyini təmin etmək məqsədi ilə yaradılıb.

Palatanın yaradılması ilə Qiymətli Kağızlar üzrə Dövlət  Komitəsi, Maliyyə Nazirliyi yanında Sığorta Nəzarəti Xidməti, Mərkəzi Bank yanında Maliyyə Monitorinqi Xidməti ləğv edilir.

Palatanı beş nəfərdən ibarət Direktorlar Şurası idarə edəcək. Şura üzvləri dövlət başçısı tərəfindən təyin edilir və çıxarılır.—06D--