Məhkəmə «Azadlıq» radiosunun Vergilər Nazirliyinə qarşı iddiasını təmin etməyib

Avqustun 17-də 1 saylı Bakı İnzibati-İqtisad Məhkəməsində Elçin Məmmədovun sədrliyilə  “Azadlıq” radiosunun Vergilər Nazirliyinə qarşı iddiasına baxılması davam edib.

İddiaçı 2015-ci ilin yanvarından 2016-cı ilin martına qədər aparılan yoxlamanın nəticələrilə bağlı vergi orqanlarının 2016-cı il martın 10-da tərtib etdiyi aktın etibarsız sayılmasını və bu aktın əsasında qəbul edilmiş 21 aprel 2016-cı il tarixli qərarın ləğvini xahiş edib.

Belə ki, səyyar yoxlama zamanı vergi əməkdaşları 131540.86  manat həcmində mənfəət vergisinin ödənilmədiyini müəyyən ediblər. Aktda bildirilir ki, “Azadlıq” radiosu mənfəət vergisini ödəməyib, işçilərin əməkhaqlarından vergini düzgün hesablamayıb.

Vergi yoxlaması 2007-ci il dekabrın 1-dən 2014-cü il dekabrın 1-dək müddəti əhatə edib.

Vergilər Nazirliyinin nümayəndəsi Hamiz Seyranov iddiaya baxılmaması  barədə vəsatət qaldırıb və bunu onunla izah edib ki, prokurorluğun “Azadlıq” radiosuna qarşı işi başa çatmayıb.

“Azadlıq” radiosunun nümayəndəsi Adil İsmayılov etiraz edərək Baş Prokurorluqda istintaqın başa çatmadığına sübut tələb edib.

“Əgər istintaq davam edibsə vergi necə başa çata bilər və bizə qarşı necə cərimə tətbiq edilə bilər? Hesab edirəm ki, məhkəmə icraatı davam etdirməlidir”, - A.İsmayılov vurğulayıb.

O həmçinin xatırladıb ki, “Azadlıq” radiosunda axtarış zamanı nümayəndəliyin bütün sənədləri, o cümlədən  möhür götürülüb və indiyədək qaytarılmayıb.

A.İsmayılov qeyd edib ki, yoxlama jurnalist Xədicə İsmayılovaya qarşı cinayət işi ilə əlaqədar aparılıb və vergi yoxlaması aktının iki bəndi üzrə ona bəraət verilib.

Qısa məşvərətdən sonra hakim Elçin Məmmədov iş üzrə icraatın dayandırılması barədə qərar qəbul edib.

İddiaçının nümayəndəsi Turan-ın müxbirilə söhbətində məhkəmənin qərarı ilə razı olmadığını bildirib. “Qərardan şikayət veriləcəkmi” sualının cavabında vəkil deyib ki, bu barədə qərara radio rəhbərliyi ilə məsləhətləşmədən sonra qəbul olunacaq.

Xatırladaq ki, radiostansiyanın Azərbaycan nümayəndəliyi və Bakı bürosu 2014-cü ilin dekabrında bağlanıb. Bundan öncə isə “Azadlıq” radiosunun şərhçisi Xədicə İsmayılova həbs olunub. 2015-ci ilin sentyabrında o, vəzifə və iqtisadi cinayətlərdə ittiham olunaraq 8,5 il müddətinə  həbs edilib.

Lakin 2016-cı il mayın 25-də Azərbaycan Ali Məhkəməsi “Azadlıq” radiosunun Azərbaycan nümayəndəliyinin qanuni fəaliyyətini tanıyıb və vəzifə səlahiyyətindən sui-istfadə və mənimsəmə ittihamlarını X.İsmayılovanın üzərindən götürərək şərti cəza müddətini  3,5 ilədək yumşaldıb. -C06-