Məhkəmə Cəlilabad rayonunun keçmiş icra başçısını 4 ay müddətinə həbs edib (yenilənib)

Bakı/09.12.20/Turan: Bir müddət əvvəl vəzifədən azad edilmiş Cəlilabad rayon icra hakimiyyətinin başçısı Namiq Zeynalov həbs ediləcək. Azərbaycan Dövlət Təhlükəsizlik Xidməti məhkəməyə müvafiq təqdimat verib.

Xatırladaq ki, Zeynalov bir neçə gün əvvəl DTX-nin əməliyyatı zamanı saxlanılıb.

Dekabrın 9-da Səbail rayon məhkəməsi DTX-nin təqdimatına baxmağa başlayıb. Zeynalova qarşı 179.2.2-ci (mənimsəmə və israf, dəfələrlə törədildikdə), 179.2.3-cü (mənimsəmə və israf, şəxs tərəfindən öz qulluq mövqeyindən istifadə etməklə törədildikdə), 179.2.4-cü (mənimsəmə və israf, ciddi ziyan vurmaqla törədildikdə), 308.2-ci (vəzifə səlahiyyətlərindən sui-istifadə), 311.3.3-cü (böyük ölçüdə rüşvət alma), 311.3.2-ci (təkrarən rüşvət alma), 313-cü (vəzifə saxtakarlığı) maddələri ilə ittiham irəli sürülüb. 

Zeynalovun həbs ediləcəyinə və bu il bənzər ittihamlarla həbs edilən 7-ci icra hakimiyyəti başçısı olacağına şübhə yoxdur. -02D-