Məhkəmə İstanbul Universitetinin doktorantını ev dustaqlığına buraxmayıb

İyunun 28-də Bakının Nərimanov Rayon Məhkəməsi hakim Hafiz Kamranovun sədrliyi ilə İstanbul Universitetinin doktorantı Fazil Qasımov barəsində seçilmiş həbs qətimkan tədbirinin ev dustaqlığı tədbiri əvəz olunması barədə vəsatəti təmin etməyib.

Bu barədə Turan-a Qasımovun vəkili Rövşanə Rəhimli bildirib.

Onun sözlərinə görə, məhkəmədə ittiham tərəfi iştirak etməyib.

Fazil Qasımovun özü məhkəmədə iştirak edib. "O, günahsız olduğunu, ittihamı qəbul etmədiyini, istintaq zamanı işgəncələrə və qeyr-insani rəftara məruz qaldığınlı məhkəmə heyətinin diqqətinə çatdırdı".

Vəkil bildirib ki, Qasımov iyunun 14-də barəsində açılan siyasi motivli cinayyət işinə xitam verilməsi və elmi fəaliyyətini davam etdirmək üçün Türkiyəyə qayıtmağına icazə verilməsi tələbi ilə iyunun 14-dən aclıq aksiyasına başlayıb. Sonadək aclığı davam etdirmək fikrindədir.

"Onun səhhəti çox ağırdır. Əvvəllər də mədəsindən əməliyyat keçirib. Məhkəmədə güclə ayaq üstə dururdu. Rəngi solmuş vəziyyətdədir, hədsiz dərəcədə arıqılayıb", deyə Rəhimli qeyd edib.

İqtisadçı Fazil Qasımov ötən ilin avqustunda Türkiyədə saxlanılıb və Azərbaycana gətirilib, burada saxta pul hazırlamaqda ittiham olunub. Həmin vaxt hakimiyyətyönlü KİV onun həbsinin bənzər ittihamlarla həbs olunmuş müxalif siyasətçi Qubad İbadoğlunun işi ilə bağlı olduğu haqqında məlumat yayıb.