Məhkəmə Rauf Mirqədirovun həbsinə icazə verdi (YENİLƏNİB)

Bakının Nəsimi rayon məhkəməsi saat 17 radələrində casusluqda ittiham olunan jurnalist Rauf Mirqədirovun həbsinə icazə vermək qərarı qəbul edib.

Bu barədə Turan-a onun vəkili Fuad Ağayev bildirib. O, saat 18-də Reportyorların Azadlıq və Təhlükəsizlik İnstitutunda mətbuat konfransı keçirəcək. -02В-

2014 Aprel 21 (Bazar ertəsi) 14:00:32

“Zerkalo” qəzetinin əməkdaşı Rauf Mirqədirov Ermənistanın xeyrinə casusluqda ittiham olunub. Bu barədə Turan-a onun vəkili Fuad Ağayev bildirib. Həbs qərarının çıxarılması üçün iş üzrə materiallar Nəsimi Rayon Məhkəməsinə göndərilibş

Xatırladaq ki, R.Mirqədirov aprelin 19-da Türkiyədən deportasiya olunduqdan dərhal sonra həbs edilib. Jurnalist Azərbaycan hakimiyyəti ilə razılaşdırılmadan Ermənistana səfərdə və erməni nümayəndələrlə əlaqələrdə təqsirli bilinir. –06D--

2014 Aprel 20 (Bazar) 13:26:44

Ötən gün Türkiyədən deportasiya olunan jurnalist Rauf Mirqədirov dövlətə xəyanətdə şübhəli bilinir. Bu barədə Turan-a vəkil Fuad Ağayev bildirib.

  O qeyd edib ki, bu gün Baş Prokurorluğun Ağır Cinayətlər üzrə İstintaq İdarəsinin müstəntiqi İbrahim Ləmbəranski ona telefon edib. “O dedi ki Mirqədirov CM-in 274-cü maddəsi (dövlətə xəyanət) ilə ittiham olunur. Mən “dövlətə xəyanət”in konkret hansı formada olduğunu soruşdum, müstəntiq söylədi ki, casusluq”, - F.Ağayev bildirib.

  Müstəntiq vəkilə bildirib ki, R.Mirqədirov istəyir ki, onu F.Ağayev müdafiə etsin

  R.Mirqədirov MTN-in təcridxanasında saxlanılır. Vəkil yalnız sabah onunla görüşə bilər.0-

2014 Aprel 19 (Şəmbə) 18:19:38

Bu gün Türkiyədən deportasiya olunmuş jurnalist Rauf Mirqədirovun taleyi məlum deyil. Ankara polisinin məumatına görə, R.Mirqədirov saat 14:00-da Ankara-Bakı aviareysi ilə yola salınıb.

Lakin təyyarə saat 16.25-də Bakıya gəlsə də R.Mirqədirov aeroportdan çıxmayıb. Onu qarşılamağa gələn jurnalist ictimaiyyətinin nümayəndələri R.Mirqədirovun taleyinə aydınlıq gətirməyə çalışıblar.

  AZAL aviaşirkətindən bildirilib ki, R.Mirqədirov adlı şəxs reys üçün qeydiyyatdan keçməyib. Hava limanının sərhəd xidmətindən isə bildirilib ki, belə şəxs sərhəd nəzarətindən keçməyib. Bu, belə düşünməyə əsas verir ki, jurnalist təyyarənin trapının yanındaca saxlanılıb.

  Bundan əvvəl də Türkiyədən deportasiya olunmuş azərbaycanlı vətəndaşların elə trapın yanında xüsusi xidmət tərəfindən saxlanması halları olub.

  Son zamanlar R.Mirqədirov məqalələrində həm Türkiyə, həm də Azərbaycan haimiyyətini tənqid edirdi.-0-

2014 Aprel 19 (Şəmbə) 14:31:37

Jurnalist Rauf Mirqədirov Türkiyədən deportasiya edilib. Onun yaxınları Turan-a bildiriblər ki, jurnalist Bakı vaxtı ilə saat 14:00-da Ankara-Bakı reysi ilə yola salınıb və saat 17:00-a yaxın Bakıda olacaq.

R.Mirqədirovun ailəsi (xanımı və qızı) Türkiyədə qalıb.-02В-

2014 Aprel 19 (Şəmbə) 12:50:54

“Zerkalo” qəzetinin xüsusi müxbiri Rauf Mirqədirov cümə günü Ankarada saxlanılıb.

Jurnalistin həyat yoldaşı Adilə xanım Turan-a bildirib ki, uşaqla birlikdə onları avtobusdan düşürüblər, sənədlərini yoxlayıblar və Raufu aparıblar.

“Bunun səbəbini sorarkən  sənədlərin vaxtının bitdiyini söylədilər. Lakin bizim təqdim etdiyimiz sənədlərə görə,  ilin sonunadək ölkədə qalmaq hüququmuz var. Bundan sonra polislər dedilər ki, məntəqədə aydınlaşdırarıq”, - o bildirib.

Sonra xanıma bildirilib ki, R.Mirqədirov deportasiya ediləcək, lakin səbəbləri açıqlanmayıb.

“Hazırda o, polisdədir, onunla görüşümə və ya telefonla danışmama imkan verilmir. Vəkil tapmağa çalışıram”, - Adilə xanım deyib.

Qeyd edək ki, R.Mirqədirov üç ildir ki, ailəsilə birgə Ankarada yaşayır. O, beynəlxalq mövzuda yazır və dəfələrlə məqalələrdə Ərdoğan hökumətinin siyasətini tənqid edib.

Şübhə yoxdur ki, onun saxlanmasının və deportasiya ehtimalının gerçək səbəbi jurnalist fəaliyyəti ilə bağlıdır. Azərbaycanın Ankaradakı səfirliyindən şərh almaq mümkün olmayıb.

“Zerkalo”qəzetinin redaktoru Elçin Şıxlı Turan-a bildirib ki, R.Mirqədirova təzyiqlər iki həftə öncə başlayıb. “Onu gözlənilmədən akkreditədən məhrum ediblər. Bundan sonra biz Türkiyənin Bakıdakı səfirinə və Azərbaycanın Ankaradakı səfirliyinə müraciət etdik. Oradan heç bir cavab almadıq. Bundan sonra akkreditədən məhrumetmədən şikayət verilməsi ilə bağlı vəkilin cəhdlərinə belə baxılmadı. Sonradan Raufa bildirilib ki, aprelin 23-dək Türkiyəni tərk etmılədir və bir daha ora gəlməməlidir.

Aprelin 18-də ölkədən çıxmaq istəyərkən saxlanılan zaman polisə bildirib ki, onsuz da ölkədən çıxır, nədən onu saxlayırlar. Görünür, qardaş ölkə hakimiyyəti ona sərf etməyən jurnalisti ölkədən nümayişkaranə şəkildə çıxarmaq istəyir”, - redaktor qeyd edib.

Xatırladaq ki, fevralda Türkiyədən digər azərbaycanlı jurnalist 27 yaşlı Mahir Zeynalov deportasiya edilib. O, Türkiyənin Today Zaman qəzetinin müxbiri olub. Deportasiyaya Tvitterdə baş nazir Rəcəb Tayyip Ərdoğanın ünvanına tənqidi yazının dərci səbəb olub. -02В-