Məhkum jurnalist beynəlxalq mükafata görə təşəkkürünü bildirir

Uydurma ittihamla həbsdə olan “Azadlıq” qəzetinin şərhçisi Seymur Həzi onu Gerd Butserius mükafatına təltif edən beynəlxalq təşkilatlara təşəkkürünü bildirib. O, öz müraciətində yazıb:  “Bu mükafat amfiteatrda həyat üçün döyüşən döyüşçüyə “həyat” deyə yüksələn alqışdır. Bu döyüşçü bu gün dünyanın hər yerində ölüm-dirim savaşı verən “azad söz”dür. Bu mükafat bütün azad söz döyüşçülərinə verilməklə təkcə azad sözə, onun fədailərinə dəstək deyil, həm də dünyamızın gələcək taleyinə məsuliyyətlə yanaşmanın ifadəsidir.  Xüsusilə, mənim adımın qabardılmasında rolu olan hər kəsə təşəkkür edirəm. Qoy, uşaqlar müharibə görməsin, azad düçüncə ölümə və zindana səbəb olmasın”.

Xatırladaq ki, Almaniyanın  ZEIT-Stiftung Fondu və Norveç    Fritt Ord Fondu 2016-cı il üçün Gerd Butserius adına mükafatın laureatlarını açıqlayıblar. Müstəqil Münsiflər Heyəti 40 nominant arasında qalibləri seçib.

Bu mükafat ənənəvi olaraq Şərqi Avropa və keçmiş SSRİ ölkələrində demokratik jurnalistika işinə öz töhfəsini verən jurnalist və KİV-ə təqdim olunur.

Bu ilin laureatları arasında «Azadlıq» qəzetinin şərhçisi və Avropadan yayımlanan “Azərbaycan saatı” teleproqramının aparıcısı Seymur Həzi də var. Uydurma ittihamla mühakimə edilən S.Həzi 5 il müddətinə həbs cəzası alıb və beynəlxalq birlik tərəfindən vicdan məhbusu tanınıb.

Bu mükafat 10 ildən çoxdur ki, verilir. Azərbaycan nümayəndələrindən bu mükafatı müxtəlif illərdə Turan agetliyi, «Azadlıq» qəzeti, Reportyorların Azadlığı və Təhlükəsizliyi İnstitutu, həmçinin jurnalistlər Rauf Mirqədirov, Şahvələd Çobanoğlu, Natiq Cavadlı, Zamin Hacı, Xədicə İsmayılova, Təhminə Tağızadə alıb.-02D-