Mehman Əliyev 2017-ci il Mətbuat Azadlığı mükafatının 18 nominantı arasındadır

Paris/26.10.17/Туран: "Sərhədsiz reportyorlar" və TV5-Monde telekanalı bu il üçün Mətbuat Azadlığı mükafatının qalibinin adını noyabrın 7-də elan edəcək. Mərasim Strasburqda Demokratiya Naminə Ümumdünya Forumu çərçivəsində keçiriləcək.

Prosedura əsasən, cəmi üç laureat olacaq: jurnalist, bloger və media qurumu.

Bu il "Sərhədsiz reportyorlar" tərəfindən cəsarəti, peşəkarlığı, müstəqilliyi və söz azadlığına sadiqliyi nəzərə alınaraq, 18 jurnalist, bloger və KİV seçilib.

Onlardan üçün noyabrın 7-də Strasburqda RSF-TV5 Monde Mətbuat Azadlığı mükafatını alacaqlar. Turan agentliyinin direktoru Mehman Əliyev "Jurnalist" kateqoriyasında nominant göstərilib.

Mehman Əliyev Azərbaycanda jurnalistikanın və müstəqil mətbuat uğrunda mübarizənin pionerlərindəndir. Sovet senzurasına müqabil o, bir neçə dostu ilə birlikdə 1990-cı ilin mayında Turan İnformasiya Agentliyini yaradıb.

Bu gün Turan Beynəlxalq Mətbuat Azadlığı İndeksində 180 ölkə arasında 162-ci yeri tutan bir ölkədə qalan yeganə müstəqil KİV-dir. Üç dildə xəbər yayan Turan ən həssas mövzuları işıqlandırmaqdan çəkinməyən reportyorlarının peşəkarlığı sayəsində mühüm informasiya mənbəyinə çevrilib.

Repressiya dalğası Mehman Əliyevi bu ilin avqustunda yaxaladı, o, həbsə salındı, Turan isə fəaliyyətini müvəqqəti olaraq dayandırmaq məcburiyyətində qaldı.

Beynəlxalq təzyiq sayəsində o, üç həftə sonra azad edildi.

Mətbuat Azadlığı mükafatı 1992-ci ildən etibarən hər il təqdim edilir və informasiya əldə etmək azadlığının əhəmiyyətini vurğulamaq məqsədi daşıyır. O, bu azadlığın müdafiəsi və ya təşviqi işinə nəzərəçarpan töhfə vermiş jurnalistlərə və KİV-ə təqdim edilir.

Hər bir mükafat 2500 avroluq pul mükafatından ibarətdir. -02D-