Mehman Əliyevin barəsində həbs qətimkan tədbiri dəyişdirilə bilər

Bakı/11.09.17/Turan: Mehman Əliyevin barəsində həbs qətimkan tədbiri dəyişdirilə bilər. Bu barədə haqqin.az səlahiyyətli mənbələrə istinadən məlumat yayıb.

Nəşrin məlumatına görə, Turan agentliyinin direktoru Mehman Əliyev öz həbsilə bağlı prezident İlham Əliyevə müraciət edib.

Qazaxıstandan qayıdan Azərbaycan prezidentinə baş verənlərlə bağlı məlumat çatdırılıb. Prezident dərhal ciddi reaksiya verib və məhkəmə-prokurorluq orqanlarına həbs-qətimkan tədbirinin dəyişdirilməsi və M.Əliyevin təcridxanadan buraxılması imkanlarına baxılmasını tövsiyə edib.

Fevralın 10-da prezident İlham Əliyev "Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə" sərəncam imzalayıb.

Söhbət qlobal və konseptual siyasi-hüquqi islahatdan gedir. Sərəncamdan sonra Ali Məhkəmə, Baş Prokurorluq, Ədliyyə Nazirliyi və DİN nümayəndələrindən ibarət xüsusi hökumət komissiyası yaradılıb.

Yarım il ərzində məsələnin fəlsəfi və tarixi tərəfləri, beynəlxalq təcrübə öyrənilib, Cinayət Məcəlləsinə fundamental dəyişikliklərlə ayrıca qanun layihəsi hazırlanıb. Qanun layihəsi prezident İ.Əliyevə təqdim edilib. Dövlət başçısı qanunvericilik təşəbbüsü hüququndan istifadə edərək layihəni parlamentə göndərib, haqqin.az xatırladır.

Bu gün saat 14:30-da və 15:00-da Bakı Apellyasiya Məhkəmsində M.Əliyevin saxlanma və girovla azad edilməsindən imtina ilə bağlı şikayəti üzrə dinləmələr olacaq. -06d--