Məmmədyarov Pentaqon nümayəndəsinə ABŞ-dakı bəzi dairələrdən şikayət edib

XİN rəhbəri Elmar Məmmədyarov bu gün ABŞ-ın müdafiə nazirinin Rusiya, Ukrayna və Avrasiya məsələləri üzrə köməkçisinin müavini xanım Evelin Farkasın başçılıq etdiyi nümayəndə heyətini qəbul edib.

XİN-in məlumatında deyilir ki, Farkas Azərbaycan ilə ABŞ arasında münasibətlərin strateji tərəfdaşlıq xarakteri daşıdığını vurğulayıb. O, ABŞ-ın terrorizmə qarşı mübarizə, enerji təhlükəsizliyi və sülhməramlı əməliyyatlar üzrə strateji maraqlarının Azərbaycanın maraqları ilə üst-üstə düşdüyünü və qeyd olunan sahələrdə iki ölkənin əməkdaşlığının təqdirəlayiq olduğunu bildirib.

O, Əfqanıstan əməliyyatının həyata keçirilməsi üçün Azərbaycanın yaratdığı tranzit imkanlarının və hava məkanından istifadənin ölkəsi tərəfindən yüksək qiymətləndirib.

Məmmədyarov öz növbəsində Azərbaycanın Əfqanıstanda sülh və sabitliyin bərqərar olmasına yardım etdiyini və ölkəmizin sülhməramlı qüvvələrinin Əfqanıstanda uğurla xidmət etdiklərini nəzərə çatdırıb.

Daha sonra o, “ABŞ-da bəzi dairələr tərəfindən Azərbaycana aid məsələlərin ictimai müzakirə obyektinə çevrilməsindən və Azərbaycana qarşı fəaliyyətlərinin iki ölkə arasında strateji xarakter daşıdığı qeyd olunan münasibətlərin ruhuna uyğun olmadığından” şikayət edib.

Tərəflər həmçinin qarşılıqlı maraq doğuran bir sıra digər məsələləri müzakirə ediblər. -02D-