Milli Məclis Fransa Senatının qətnaməsini pisləyib

Bakı/16.11.22/Turan: Noyabrın 16-da Milli Məclis Fransa Senatının Azərbaycanın suverenliyinə qarşı yönələn qətnaməsinə dair bəyanat qəbul edib.

Müzakirələri açan Milli Məclisin spikeri Sahibə Qafarova qeyd edib ki, Senatın qətnaməsinin hər bir sətri Azərbaycana qarşı nifrətlə doludur.

“Heç bir mənəvi, hüquqi və siyasi haqqı olmadan Fransa Senatında qəbul edilən bu qətnamə göstərir ki, Fransa ilə Azərbaycan arasında münasibətlərə xələl gətirməyə, Avropa İttifaqı və Azərbaycan arasında münasibətlərə zərbə vurmağa hazırdırlar. Biz Fransanı Ermənistanı təcavüzkar yox, qurban kimi qələmə vermək cəhdlərindən əl çəkməyə çağırırıq”, - Qafarova deyib.

Son iki ildə Fransa parlamenti dəfələrlə Azərbaycana qarşı ədalətsiz mövqe nümayiş etdirib.

Fransa Senatının qəbul etdiyi sənəd Azərbaycana qarşı bədxah və çirkin niyyətli siyasi aksiyadır. Hər sətrindən Azərbaycan xalqı və dövlətinə nifrət yaradan qətnamə Ermənistanın ölkəmizə qarşı ərazi iddiaları və qəsbkarlıq siyasətinə haqq qazandırır.

Debatlar zamanı hökumətyönlü Vətən Partiyasının rəhbəri Fəzail Ağamalı Fransa ilə münasibətlərə yenidən baxılmasını və Azərbaycan səfirinin Parisdən geri çağırılmasını təklif edib.

Vəhdət Partiyasının rəhbəri, deputat Tahir Kərimli Fransanın düşmən dövlət elan edilməsini təklif edib.

Deputat Cavid Osmanov diqqəti ona yönəldib ki,

Azərbaycan neft və qazının ixracına embraqo qoyulması ilə bağlı Senatın hökumətə çağırışı Fransa xalqının özünün və Avropa İttifaqının maraqlarına ziddir.16В