Milli Şura inzibati həbs yerlərində qeyri-insani şərait barədə

Bakı/31.01.20/Turan: Demokratik Qüvvələrin Milli Şurası (NSDS) bəyanat yayaraq siyasi motivli inzibati həbslərin sayının artmasına diqqəti çəkib.

Milli Şura hakimiyyətdən İnzibati Həbs Olunanların Saxlanma Məntəqəsində (İHOSM) saxlanma şəraitinin yaxşılaşdırılması, rejim qaydalarının dəyişdirilməsi, orada saxlanılanlara, xüsusən də müxalif fəallara qarşı qanunsuz tələblərə, təzyiq və təsirlərə son qoyulması üçün təcili addımlar atmağa çağırır. Milli Şura həmçinin ölkə ictimaiyyətini bu məsələni gündəmdə saxlamağa çağırır.

Milli Şura hesab edir ki, cəmiyyət İHOSM-da saxlanılma şəraitinin yaxşılaşdırılmasına, absurd və insanlığa zidd qadağaların, təzyiq və kobud rəftarın aradan qaldırılmasına mütləq nail olmalıdır.

“Oradakı mövcud vəziyyət həm də bu sahə ilə maraqlanan, monitorinq aparan beynəlxalq təşkilatların gündəminə çevrilməlidir və bunun üçün də Azərbaycanın vətəndaş cəmiyyəti öz səylərini əsirgəməməli, həmin təşkilatlarla fəal iş aparmalıdır”, -  sənəddə qeyd olunur.

Milli Şura bildirir ki, Azərbaycanda son illərdə inzibati qaydada həbslərin sayı xeyli artıb. Xüsusən də müxalifət partiyalarının üzvləri və müxalif fikirli ictimai fəallar tez-tez müxtəlif bəhanələrlə inzibati həbslərə məruz qalır.

“Hazırda inzibati həbs cəzasına məhkum edilənlər cəzalarını DİN İnzibati Həbs Olunanların Saxlanma Məntəqəsində (İHOSM) çəkirlər. Əldə olunan məlumatlar göstərir ki, bu məntəqədə rejim qaydaları çox sərtdir və törədilmiş inzibati xəta əməllərinə adekvat deyil. Cinayət işi üzrə istintaq təcridxanasında saxlanılan təqsirləndirilən şəxslər üçün tətbiq edilən rejim qaydaları, hətta ağır cinayətlər törətmiş şəxslərin cəzaçəkmə şəraiti belə İHOSM-dakı rejim qaydalarından qat-qat yumşaq və daha liberal qiymətləndirilir. Rejim qaydalarının sərtliyi və qeyri-insani olması ilə İHOSM əslində, bir haupvaxt və ya karser sisteminə bənzəyir. Ağır cinayət törətmiş şəxslər belə, cəzaçəkmə müəssisəsində gün ərzində istədikləri qədər açıq havada qala, müəyyən edilmiş periodlarda 3 nəfərədək ailə üzvləri və yaxın adamları ilə görüşə və sovqat ala bilər. İHOSM-da isə inzibati həbs cəzası çəkən şəxs yalnız ailə üzvü olmaqla cəmi bir nəfərlə, cəmi 5 dəqiqəliyə, özü də şüşə arxasından görüşə bilər. Evdən sovqat adına ancaq peçenye, Koka-Kola, Fanta, şəkər və siqaret qəbul edə bilər. Bu, əslində şəxsə qarşı qida terrorudur”, - bəyanatda bildirilir.

Sənəddə deyilir ki, İHOSM-da saxlanılanlara qarşı kobud rəftar, zorakılıq və xüsusən də müxalifətçilərin satın alma məqsədilə mənəvi-psixoloji basqıya məruz qalması ciddi narahatlıq doğuran məlumatlar sırasındadır.

“Hətta başqa hüquq- mühafizə orqanları əməkdaşlarının belə İHOSM-a gələrək müxalif fəallara mövqelərini dəyişmək, yaxud polis və  xüsusi xidmət orqanları ilə əməkdaşlığa razı olmaq üçün təzyiq və təsir göstərə bildiyi haqda məlumatlar var. Göründüyü kimi, DİN-in bu saxlanma məntəqəsindəki vəziyyət kifayət qədər ciddi problemdir”,- Milli Şura qeyd edir. -03D-