Milli Şura Qarabağ mitinqinə görə tutulanlara azadlıq tələb edir

Azərbaycan hakimiyyəti 14-15 iyul tarixdə Bakıda keçirilən Qarabağ yürüş-mitinqini müxalifətə və ictimai fəallara qarşı yeni repressiya fürsətinə çevirib və çox acınacaqlıdır ki, buna birbaşa ölkə prezidenti İlham Əliyev göstərişi verib.

İlham Əliyev iyulun 15-də Nazirlər Kabinetinin videokonfrans formatında keçirdiyi iclasında həmin yürüş-mitinq barədə geniş danışaraq, aksiyanın sonlarında hakimiyyət orqanlarının hazırladığı şübhə doğurmayan təxribatın məsuliyyətini müxlifətin, konkret olaraq Azərbaycan Xalq Cəbhəsi Partiyasının (AXCP) üzərinə atıb. O, hüquq-mühafizə orqanlarına AXCP üzvlərinin hətta sosial şəbəkədəki fəaliyyətlərinə qədər araşdırma altına alınmasını göstəriş verib, Milli Şura və AXCP-nin ünvanına ağır ittihamlar səsləndirib, “satqınlar”, “yaramaz ünsürlər”, “Xalq Cəbhəsinin tör-töküntüləri” kimi aşağılayıcı və “Bunların dərsini vermişik, verəcəyik...”, “Onlara elə dərs veriləcək ki, bu, son dərs olacaqdır…” kimi hədələyici ifadələr işlədib.

İlham Əliyevin bu direktiv-çıxışından dərhal sonra AXCP-nin 6 nəfər üzvü saxlanılaraq polis idarələrinə və bölmələrinə aparılıb. AXCP üzvlərindən başqa aksiyada iştirak etmiş çoxlu sayda sadə vətəndaş və bir neçə ictimai fəal da saxlanılıb. Saxlanılanlardan bəziləri sonradan sərbəst buraxılsa da, həbslər davam edir. Azərbaycan Baş Prokurorluğu yanında Ağır Cinayətlər üzrə İstintaq İdarəsində fktla bağlı cinayət işi başlanıb və saxlanılanlardan 3 nəfər haqqında artıq həbs-qətimkan tədiri seçilib. Saxlanılanlardan daha neçə nəfərin, o cümlədən AXCP üzvlərinin barəsində həbs qərarının verilib-verilməyəcəyi hələ bəlli deyil.

Aksiyada iştiraka görə saxlanılan AXCP üzvlərindən biri Qarabağ qazisi, partiyanın Rəyasət Heyətinin üzvü, 5 illik siyasi məhbus həyatını yenicə başa vurmuş Asif Yusiflidir. Bu sənəd hazırlanana qədər onunla yanaşı partiya fəallarından Seymur Əhmədzadə, Məhəmməd İmanlı, Elvin Məmmədov, Ramil Tağıyev və Vuqar Əbilov da saxlanılmışdı. Daha 2 nəfər AXCP üzvü - Mətanət Mahmarzayeva və Fərid Əsədov isə 1 gün polisdə saxlanılandan sonra sərbəst buraxılmışdı.

Təəssüflə xatırlatmalıyıq ki, bu, İlham Əliyevin Milli Şura və AXCP-yə qarşı ilk nifrət çıxışı deyil. Bu ilin 19 mart tarixindən bəri o, az qala hər çıxışında Milli Şuranın və Xalq Cəbhəsinin ünvanına eyni səpkidə aqressiya ifadə edir. Onun mart ayındakı nifrət çıxışından bəri 30 nəfərdən artıq jurnalist, ictimai və siyasi fəal inzibati qaydada həbs olunub, onlardan 22 nəfər AXCP üzvüdür.

Milli Şura 14-15 iyul yürüş-mitinqini tam dəstəkləsə də, orada təşkilat olaraq iştirak etməyib. Nəzərə alıb ki, prosesə qatılsa, hökumət mütləq təxribata əl atar və bundan geniş repressiya üçün istifadə edər. Milli Şura aksiyanın təxribatsız, zorakılıq və həbslərsiz başa çatnasında maraqlı olub. Aksiyada az sayda AXCP üzvü iştirak edib, onlar da heç bir qanunsuzluğa yol verməyib. Milli Şura hər şeyi edib ki, hökumətin təxribat və repressiyalar üçün bəhanəsi olmasın. Ancaq təcrübə bir daha göstərdi ki, hakimiyyət bəhanəsiz də təxribat və repressiya edir.

Milli Şura Azərbaycan xalqının bu böyük vətənpərvərlik nümayişinin, Qarabağdan vaz keçməyəcəyi mesajının şəsxən ölkə başçısı səviyyəsində gözdən salınmasını və müxalifətə, vətəndaş cəmiyyətinə qarşı repressiya üçün istifadə edilməsini qətiyyətlə pisləyir. Azərbaycan ictimaiyəti buna etinasız yanaşmamalı, öz etirazını uca səslə bildirməlidir. Qarabağı işğaldan qurtarmaq çağırışı ilə meydana çıxan heç kim cəzalandırıla bilməz. O yürüş-mitinqdə baş verən təxribatın oradakı minlərlə iştirakçıya, o cümlədən AXCP üzvlərinə heç bir aidiyyatı yoxdur. Milli Şura 14-15 iyul aksiyasına görə saxlanılan AXCP üzvlərinin və başqa günahsız insanların dərhal sərbəst buraxılmasını tələb edir.

Milli Şura demokratik dünyaya və Azərbaycanın da üzv olduğu beynəlxalq təşkilatlara çağırış edir ki, son baş vderənlərin fonunda ölkədəki repressiv mühitin birbaşa prezident İlham Əliyevdən qaynaqlandığını nəhayət, aydın görsünlər və vəziyyəti müsbətə doğru dəyişmək üçün bilavasitə onun özünə ciddi, təsirli təzyiqlər göstərilməli olduğunu bilsinlər.

Milli Şura bəyan edir ki, Azərbaycanda demokratiyanın bərqərar olması, insan hüquq və azadlıqlarının qorunması naminə mübarizəsini heç nəyə bxmadan, bundan sonra da bütün qətiyyəti ilə davam etdirəcək.-0-