Milli Şura Rəsul Cəfərovun barəsində hökmü pisləyib, bütün siyasi məhbusların azad olunmasını tələb edib

Yerli və beynəlxalq demokratik ictimaiyyətin etirazlarına baxmayaraq, Azərbaycan hakimiyyəti vətəndaş cəmiyyəti fəallarına qarşı repressiyaları davam etdirir. Fəallar təqiblərə, uydurma ittihamlarla həbslərə məruz qalır, onlara fantastik cəza müddətləri təyin edilir. Bu barədə Azərbaycan Demokratik Qüvvələrin Milli Şurasının (DQMŞ) bəyanatında deyilir.

Əsasən bu, Azərbaycan vətəndaş cəmiyyətinin tanınmış və parlaq nümayəndəsi Rəsul Cəfərovun 6,5 il müddətinə azadlıqdan məhrum edilməsi barədə hökmdə özünü göstərir.

İttiham tərəfi digər tanınmış hüquq müdafiəçisi İntiqam Əliyevin də 10 il müddətinə mühakimə olunmasını istəyir. Halbuki, məhkəmə ona qarşı irəli sürülən vergidən yayınma, sui-istifadə, qanunsuz sahibkarlıq kimi  absurd ittihamları sübuta yetirə bilməyib.

Hakimiyyət yalnız fəalların həbsi ilə kifayətlənmir, onlara həbsxanada  da rahatlıq vermir. Belə ki, jurnalist Araz Quliyevin (dini xeber.44.com saytının baş redaktoru) cəza şəraiti sərtləşdirilib və o, qapalı həbsxanaya göndərilib. A.Quliyevlə birlikdə etiraz edən digər məhbusların da aqibəti eynidir.

“Vicdan məhbusu” Tale Bağırzadə uydurma ittihamla Qobustan qapalı həbsxanasına köçürülüb. AXCP fəalları Saqif Qurbanov, Türkel Azərtürk və Ruslan Nəsirli 5 aprel mitinqindən sonra inzibati həbslərə məruz qalıblar.

“Yuxarıda deyilənlər göstərir ki, beynəlxalq təcrid kursunu götürən və öz dayaqlarını itirən Əliyev rejimi artan sosial-iqtisadi narazılıq şəraitində öz kürsüsünü qorumaq üçün repressiyalara əl atır”, - bəyanatda vurğulanır.

DQMŞ Azərbaycan xalqının ləyaqətli həyat şəraitinin təmin edilməsi, vətəndaşların hüquq və azadlıqlarının müdafiəsi, “siyasi məhbuslarsız Azərbaycan” ideyasının gerçəkləşməsi üçün mübarizəni davam etdirəcək.

Sonda DQMŞ hakimiyyətdən repressiyalara son qoyulmasını, bütün siyasi məhbusların azadlığa buraxılmasını bir daha tələb edib.—06D-