Milli Təhlükəsizlik Nazirliyinin İstintaq İdarəsinin keçmiş rəhbərliyi uzun müddətə mühakimə edilib

Bakı/26.07.22/Turan: Sentyabrın 21-də Bakı Ağır Cinayətlər Məhkəməsində keçmiş Milli Təhlükəsizlik Nazirliyinin bir qrup yüksək vəzifəli zabitinin barəsində hökm çıxarılıb.

Belə ki, ləğv edilmiş Milli Təhlükəsizlik Nazirliyinin İstintaq İdarəsinin keçmiş rəisi, general-mayor Mövlam Şıxəliyev 12 il müddətinə azadlıqdan məhrum edilib. Onun müavini Yasin Məmmədov  10,5 il müddətinə cəza alıb. İstintaq İdarəsinin 2-ci şöbəsinin keçmiş rəisi Vüsal Ələkbərov 11 il 2 ay, həmin idarənin kriminalistika şöbəsinin rəis müavini Sahib Ələkbərov isə 8 il müddətinə azadlıqdan məhrum edilib.

Məmmədov, həmçinin Vüsal və Sahib Ələkbərovlar məhkəmə zalında həbs ediliblər.

İş üzrə keçən şəxslər Cinayət Məcəlləsinin 182.3.1, 182.3.2 (mütəşəkkil dəstə tərəfindən və külli miqdarda əmlak əldə etmək məqsədilə hədə-qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs tərəfindən rüşvət alma) və digər maddələrlə təqsirli biliniblər.  

Onların hamısı iş adamlarından hədə-qorxu ilə pul tələb etməkdə və ümumilikdə 17 milyon manata yaxın vəsaiti mənimsəməkdə günahkar biliniblər. Cinayət işində 32 zərərçəkmiş şəxs keçir.

Məhkəmə Şıxəliyevin ailə üzvlərinin adına sənədləşdirilmiş ümumi dəyəri 9 milyon manat olan daşınmaz əmlakın müsadirə edilməsini qərara alıb. Bunlar paytaxtın Səbayel, Binəqədi, Nəsimi və Nərimanov rayonlarında, həmçinin Ağdaş şəhərində olan mənzil və villalardır. 06B