MKİ rəhbəri postuna namizəd bir neçə il Bakıda çalışıb

Bakı/10.05.18/Turan: Mayın əvvəlində ABŞ Mərkəzi Kəşfiyyat İdarəsi (MKİ) ilk dəfə olaraq qurumun rəhbəri postuna yeni iddiaçı Cina Haspelin tərcümeyi-halından bəzi məqamları açıqlayıb. O, təkcə MKİ-yə rəhbərlik edəcək ilk qadın yox, həm də rus dilini yaxşı bilən direktor ola bilər

Onun tərcümeyi-halında bildirilir ki, 1985-ci ildə MKİ-də öz karyerasına başlayan C.Haspel 1990-cı illərdə qurumun Avropa və Avrasiya bölmələrində çalışıb, əsasən Rusiya istiqamətinə kuratorluq edib.

BBC-nin məlumatına görə, "onun Rusiyaya 15 illik gizli ezamiyyəti olub".

"Keçmiş həmkarları bildirirlər ki, bəzi ezamiyyətlərdə o, rusiyalı agentlərə qarşı əməliyyatlara rəhbərlik edib", - The Washington Post yazır.

BBC-nin məlumatına görə, o, bir neçə il Azərbaycanda da işləyib. Belə ki, CBS News məlumat verib ki, 1990-cı ilin sonlarnda C.Haspel Bakıda MKİ-nin yerli rezidenturasına rəhbərlik edib, 1998-ci ildə Keniyada və Tanzaniyada Amerika səfirliklərinə hücumda ittiham olunan iki nəfərin tutulması üzrə uğurlu əməliyyata cəlb edilib. Eyni zamanda Ankarada Amerika rezidenturasının rəhbəri olub və türk dilini də yaxşı öyrənib.

ABŞ-ın Azərbaycandakı səfirliyinin keçmiş əməkdaşlarından biri C.Haspelin Bakıda işlədiyini təsdiqləyib, ancaq tutduğu vəzifəni açıqlamayıb. Təsdiqlənməmiş məlumatlara görə, o, USAID strukturunda çalışıb.-02D-