Möhkəm sülh mümkündür: Dövlət Departamenti “Azərbaycan-Ermənistan danışıqlarına dərindən cəlb edilib"

Vaşinqton/12.01.24/Turan: ABŞ Ermənistanla Azərbaycan arasında möhkəm sülhün mümkün olduğuna inanmağa davam edir, cümə axşamı Dövlət Departamentinin nümayəndəsi bildirib.

"Bu, Departamentin üzərində işləməyə davam edəcəyi şeydir", - brifinqdə mətbuat katibinin birinci müavini Vedant Patel bu həftə xüsusi müşavir Lui Bononun Ermənistana səfərindən sonra sülh prosesinin cari vəziyyətilə bağlı Turan-ın  sualının cavabında deyib.

"Aydındır ki, Bono, dövlət katibi Blinken və digərləri bu məsələ ilə fəal məşğul olmağa davam edirlər",- Patel deyib. Lakin o, qarşıdakı hər hansı plan və ya danışıqları müzakirə etməkdən çəkinib.

Cümə axşamı bundan öncə dövlət katibinin Avrasiya üzrə köməkçisi Ceyms O'Brayen də Vaşinqtonun sülh prosesini dəstəkləməyi davam etdirmək niyyətini bildirib. "Hələ faydalı ola biləcəyimiz dərəcədə üzərində işləməli olduğumuz iş var", - o deyib.

Cümə axşamı Dövlət Departamenti gələn həftə dövlət katibi Blinkenin Davosa səfər edəcəyini bildirib. O,  transatlantik təhlükəsizlik və beynəlxalq dünya düzəni daxil olmaqla, qlobal narahatlıq doğuran məsələləri müzakirə etmək üçün liderlərlə görüşəcək.

Davosda Blinkenin Azərbaycan və Ermənistan liderlərilə görüşəcəyi istisna olunmur. -0-