Moskva Xəzər ölkələri parlament konfransının keçirilməsini təklif edir

Bakı/27.09.22/Turan: Sentyabrın 26-da Milli Məclisin spikeri Sahibə Qafarova Azərbaycanda rəsmi səfərdə olan Rusiya Federasiyası Dövlət Dumasının sədri Vyaçeslav Volodini qəbul edib.

Milli Məclisin mətbuat xidmətinin məlumatına görə, görüş zamanı iki ölkənin qanunverici orqanları arasında əlaqələrin müxtəlif aspektlərinə dair fikir mübadiləsi aparılıb.

Qafarova bildirib ki, indiyədək iki ölkə rasında 250-dən çox dövlətlərarası və hökumətlərarası sənəd imzalanıb.

“Bu sahədə bu ilin fevralında prezident İlham Əliyevin Rusiyaya rəsmi səfəri zamanı imzalanmış Azərbaycan və Rusiya arasında müttəfiqlik qarşılıqlı fəaliyyəti haqqında bəyannamə münasibətlərimizi yeni səviyyəyə qaldırıb”, - o qeyd edib.

Öz növbəsində Vyaçeslav Volodin  əlaqələrin daha da möhkəmləndirilməsinə çağırıb və bir sıra təşəbbüslərlə çıxış edib. Rusiya Dövlət Dumasının mətbuat xidmətinin məlumatına görə, Volodin dövlət başçılarının qərarlarını, xüsusilə müttəfiqlik qarşılıqlı fəaliyyəti haqqında müqaviləni təmin etmək üçün iki ölkənin qanunvericiləri arasında əlaqələri canlandırmağa çağırıb.

"Qarşılıqlı fəaliyyətin yeni formatlarını müzakirə etmək düzgün olardı", - o deyib. Strateji məsələlərin - təhlükəsizlik, gəmiçilik, ekologiya və ətraf mühitin mühafizəsi müzakirəsi üçün belə format Xəzəryanı ölkələrin parlament konfransı ola bilər, Volodin qeyd edib.

“Hazırda Azərbaycanda Rusiya Federasiyasının təhsil standartlarına uyğun məktəblərin yaradılması, Rusiya ali məktəblərinin filiallarının açılması ilə bağlı müzakirələr gedir. Bütün bunlar, əlbəttə ki, əlaqələrimizi daha da möhkəmləndirir”, - Volodin deyib.

O, mədəni dialoqun davam etdirilməsi üçün Dövlət Dumasında Heydər Əliyevin 100 illik yubileyinə həsr olunmuş sərginin keçirilməsini təklif edib. Həmçinin Sahibə Qafarovanı ilin sonunadək Rusiyaya səfərə və Rusiya Dövlət Duması ilə Azərbaycan Milli Məclisi arasında qarşılıqlı əlaqələrə dair saziş imzalamağa dəvət edib.

Qeyd edək ki, Dövlət Dumasının nümayəndə heyətinin tərkibinə  sədrin iki müavini - Aleksey Qordeyev və Vladislav Davankov, habelə komitələrin rəhbərləri: MDB işləri, Avrasiya inteqrasiyası və həmvətənlərlə əlaqələr üzrə komitənin rəhbəri Leonid Kalaşnikov; müdafiə  -Andrey Kartapolov; nəqliyyat və infrastruktur - Yevgeni Moskviçev; elm və ali təhsil - Sergey Kabışev; regional siyasət və yerli özünüidarəetmə -Aleksey Didenko daxildir.02D