MŞ-dən prezidentliyə vahid namizəd məsələsi açıq qalıb (YENİLƏNİB)(video)

Cümə günü Demokratik Qüvvələrin Milli Şurasının təsis konfransı Azərbaycanın demokratik qüvvələrinin geniş koalisiyasını birləşdirən təşkilatın bəyannaməsinin və nizamnaməsinin qəbulu ilə başa çatıb.

Lakin əsas intriqa – qarşıdakı prezident seçkilərinə Milli Şuradan vahid namizədin irəli sürülməsi məsələsi baş tutmayıb.

Çıxış edənlərin hamısı tanınmış dramatur Rüstəm İbrahimbəyovun vahid namizəd kimi irəli sürülməsi təklifini dəstəkləyiblər, lakin vahid namizəd barədə qərarın MŞ-yə daxil olan bütün partiyalar tərəfindən ayrılıqda müzakirə  olunmasına, sonradan Milli Şura üzvlərinin ümumi səsverməsinə çıxarılma

sına tərəfdar oduqlarını bildiriblər.

Güman etmək olar ki, bu məsələ bir neçə həftə davam edəcək və sürpriz baş verməyəcək, vahid namizəd R.İbrahimbəyov olacaq.

MŞ-nin bəyannaməsində deyilir ki, təşkilatın namizədi prezident seçkilərində qalib gələrsə, ikiillik keçid dövründə aşağıdakı addımlar atılacaq: parlament seçkiləri majoritar-proporsional sistem üzrə paritet əsaslarla keçiriləcək; hakimiyyətin desentralizasiyasını nəzərdə tutan yeni Konstitusiya qəbul olunacaq, prezidentin səlahiyyətləri məhdudlaşdırılacaq və qanunverici, icra və məhkəmə hakimiyyətləri arasında real balans təmin olunacaq; hökumət parlament çoxluğu tərəfindən formalaşacaq.

Yeni Konstitusiyanın əsasında (2015-ci il) yeni azad və ədalətli parlament, prezident və bələdiyyə seçkilərinin keçirilməsi nəzərdə tutulur.

Xarici siyasətin əsas prioriteti Qarabağ münaqişəsinin Azərbaycanın ərazi bütövlüyünün bərpası əsasında nizamlanması  olacaq.-0-

2013 İyun 07 (Cümə) 12:57:53

Kinodramaturq Rüstəm İbrahimbəyov Demokratik Qüvvələrin Milli Şurasının sədri seçilib.

Onun namizədliyini Müsavat Partiyasının lideri İsa Qəmbər irəli sürüb.

R.İbrahimbəyovun namizədliyini DQMŞ təsis konfransının iştirakçılarının əksəriyyəti dəstəkləyib. İki nəfər əleyhinə olub, iki nəfər bitərəf qalıb.

R.İbrahimbəyov özü iclasda iştirak etmir və ölkəyə iyunun sonlarında qayıdacaq -06В-

Bu gün Vətəndaş Həmrəyliyi Partiyasının (VHP) mənzil-qərargahında Demokratik Qüvvələrin Milli Şurasının təsis iclası keçirilir.

Toplantını  Ziyalılar Forumunun Koordinasiya Şurasının üzvü, 

 professor Cəmil Həsənli açıb. Azərbaycanın himni səslənib. Azərbaycanın ərazi bütövlüyü  və demokratiya uğrunda həlak olanların xatirəsi bir dəqiqəlik sükutla yad edilib.

İclasda 97 nəfər iştirak edir. Onlar müxalifət partiyalarının, vətəndaş cəmiyyətinin, elmi və yaradıcı ziyalıların nümayəndələridir.

C.Həsənli qeyd edib ki, DQMŞ-nin yaradılması dərin sosial-iqtisadi problemlər, yüksək korrupsiya, insan haqlarının kütləvi pozulması, Qarabağ məsələsində irəliləyişin olmaması ilə əlaqədar zamanın tələbidir.

İclas iştirakçıları yekdilliklə DQMŞ-nin yaradılmasına səs veriblər. Həmçinin gündəliyə DQMŞ-nin Əsasnaməsi, bəyannamə və dünya birliyinə müraciət qəbul edilməsi məsələləri daxil edilib.

Hüquq müdafiəçisi Leyla Yunus təklif edib ki, gündəliyə DQMŞ-dən prezidentliyə vahid namizədin, konkret olaraq Rüstəm İbrahimbəyovun namizədliyinin irəli sürülməsi daxil edilsin. O bu təkifi onunla əsaslandırıb ki, bu gün hakim partiya da qurultay keçirir və hakimiyyətdən İlham Əliyevin namizədliyini irəli sürəcək. Bu, zalda coşqun müzakirələrə səbəb olub.

Liberal Partiyasının rəhbəri Əvəz Temirxan bu təklifi dəstəkləyib.

        EL hərəkatının lideri Eldar Namazov R.İbrahimbəyovun namizədliyini dəstəkləyib və bu məsələ ilə bağlı siyasi partiyalarla məsləhətləşmələrin aparılmasının vacibliyini qeyd edib.

Müsavat Partiyasının aparat rəhbəri Arif Hacılı  və başqa iştirakçılar birinci iclasda vahid namizəd barədə müzakirələrin əleyhinə çıxış ediblər.

Yekunda L.Yunusun təklifinə 13 nəfər səs verib, iki nəfər bitərəf qalıb.

  Sonra DQMŞ haqqında Əsasnamə qəbul olunub. Əsasnaməyə görə, DQMŞ-nin ali orqanı 2 həftədə 1 dəfə çağırılan sessiyadır. DQMŞ sessiyası sədri seçir və sədr sessiyalararası müddətdə orqana rəhbərlik edir. İclas davam edir.

DQMŞ-yə  Müsavat, Xalq Cəbhəsi, Vətəndaş Həmrəyliyi, Klassik Xalq Cəbhəsi, Liberal, Açıq Cəmiyyət, Aydınlar, İslam, Böyük Azərbaycan, Milli Birlik partiyalarının, EL hərəkatının lider və fəalları daxildir. Bundan əlavə, Milli Şuraya siyasi məhbuslar da daxildir.–C06-