MSK Mehman Hüseynovun şikayətinə baxacaq

Bakı/04.02.20/Turan: 31 saylı Suraxanı ikinci seçki dairəsindən deputatlığa namizəd bloger Mehman Hüseynovun parlament seçkilərində rəqibi Fərəc Quliyev tərəfindən ələ alınması ilə bağlı şikayəti artıq MSK-ya daxil olub və baxılacaq. Bu barədə Turan-a M.Hüseynov MSK nümayəndələrinə istinadən məlumat verib.

“Dünən iş gününün sonunda MSK-da olduq. Bizə dedilər ki, mənim şikayətim artıq daxil olub və baxılacaq”, - M.Hüseynov deyib. Dairə Seçki Komissiyasında blogerin şikayətinin alındığını da təsdiqləyiblər. “mənə dedilər ki, bu məsələ MSK-nın səlahiyyətindədir”, - M.Hüseynov bildirib.

Xatırladaq ki, fevralın 1-də M.Hüseynov Fərəc Quliyevlə söhbətinin audioyazısını yayımlayıb. O, blogerə 15 min manat qarşılığında namizədliyini geri götürməyi təklif edir.

F.Quliyev audioyazının həqiqi olduğunu etiraf edib, bildirib ki, pulu onu ələ almaq üçün deyil, müalicə üçün təklif edib.

Hüquqşünaslar F.Quliyevin hərəkətində cinayət əməlinin əlamətləri olduğunu və namizədliyinin ləğv edilməli olduğuna dair fikirlər səsləndiriblər.

Fərəc Quliyev 2000-ci illərin əvvəllərində müxalif düşərgəsindən ayrılıb hakimiyyət tərəfinə keçməsi ilə tanınır. 1995-ci ildə mühakimə olunaraq və bir neçə il həbsxanada qalıb. 2002-ci ildə əfv edilib və azadlığa buraxıldıqdan sonra keçmiş tərəfdaşlarını - demokratları və Xalq Cəbhəsi tərəfdarlarını kəskin tənqid etməyə başlayıb.

2010 və 2015-ci illərdə F.Quliyev Milli Dirçəliş Hərəkatı Partiyasının sədri kimi parlamentin deputatı seçilib. 06D--