MTN-in keçmiş şöbə rəisi və onun xanımı dövlətə xəyanətə görə mühakimə olunublar

Bakı/12.02.20/Turan:  Bakı Hərbi Məhkəməsi Milli Təhlükəsizlik Nazirliyinin keçmiş şöbə rəisi Zakir İsmayılovu 19 il,   onun xanımı Nəzakəti isə 10 il dövlətə xəyanət ittihamı ilə mühakimə edib. Bu barədə bəzi yerli KİV məlumat yayıb.

Xatırladaq ki, hələ 2018-ci ilin dekabrında Azərbaycan Dövlət Təhlükəsizliyi Xidməti “bir neçə il Azərbaycanda çoxmərhələli casusluq fəaliyyəti həyata keçirən “xarici xüsusi xidmət kəşfiyyat şəbəkəsinin” ifşa olunduğunu bildirmişdi.

Dekabrın 26-da DTX ictimaiyyətlə əlaqələr şöbəsi bildirmişdi, casusluq şəbəkəsinə Azərbaycanın xüsusi xidmət orqanlarının əməkdaşları da cəlb olunublar.

“Milli Təhlükəsizlik Nazirliyinin şöbə rəisi və digər məsul vəzifələrdə çalışan Zakir Əlibala oğlu İsmayılov (1959-cu ildə anadan olub) xarici xüsusi xidmət tərəfindən gizli əməkdaşlığa cəlb edilib”, - deyə məlumatda bildirilirdi.

İstintaqın versiyasına görə, o, maddi mükafat qarşılığında əks-kəşfiyyat fəaliyyəti, dövlət təhlükəsizliyi orqanlarının şəxsi heyəti haqqında bilgi və digər məxfi məlumatları mütəmadi olaraq xarici xüsusi xidmətə ötürürmüş.

2015-ci ildə pensiyaya çıxdıqdan sonra da  əməkdaşlığı davam etdirib.

Məlumatda qeyd olunur ki, Milli Təhlükəsizlik Nazirliyinin digər keçmiş əməkdaşı Bəhruz Yaşar oğlu Yusifzadə (1977-ci ildə anadan olub) dövlət təhlükəsizliyi orqanlarında ehtiyata çıxdıqdan sonra işə ələ alınıb.

2018-ci ildə Z.İsmayılovun həyat yoldaşının Azərbaycana qarşı casusluqda rolu barədə heç nə deyilməyib. Bu iş üzrə məhkəmə prosesi 2019-cu ilin sentyabrında başlayıb. Mühakimə olunmuş çütlük öz günahını etiraf etməyib və apellyasiya şikayəti veriblər. Kimin xeyrinə casusluq etdikləri açıqlanmır. -02D-