Müdafiə tərəfi H.Məmmədovun işi üzrə prosesin açıq keçirilməsinə nail olmağa çalışır

“Tolışi sədo” qəzetinin redaktoru Hilal Məmmədovun vəkilləri çətin vəziyyətə düşüblər. Bir tərəfdən Məmmədov işi üzrə qapalı proses keçirilməsinə qarşı etiraz əlaməti olaraq onlardan iclasda iştirak etməməyi tələb edib.

Digər tərəfdən, hakim vəkillərin sonuncu iclasda iştirak etməməsi ilə əlaqədar Vəkillər Kollegiyasına şikayət yazıb. 

Bugünki mətbuat konfransında vəkil Anar Qasımlı bildirib ki, bu vəziyyətdə vəkillər Kollegiyadan nə etməli olduqları barədə izahat istəmək niyyətindədirlər. Adətən belə hallarda təqsirləndirilən şəxsin istəyi əsas götürülür.

Qasımlı jurnalistləri və hüquq müdafiəçilərini Məmmədovun işini daimi ictimai nəzarət altında saxlamağa çağırıb.

Vəkil Xalid Bağırov bildirib ki, Məmmədovun işi üzrə proses bundan sonra da qapalı olsa o, cinayət işinin materiallarını ictimaiyyətə açıqlamaq niyyətindədir.

“Buna hüququm var, çünki sirri yaymamaq barədə iltizam verməmişəm. Proses bundan sonra da qapalı keçsə, məhkəmə iclaslarına getməsəm də, bunun əvəzində mətbuat konfransları keçirəcəyəm”, deyə Bağırov bildirib.

O, həmçinin Məmmədovun 2009-cu il tarixli məqaləsində millətlərarası ayrı-seçkilik görən ekspertlərin rəylərini əsasssız adlandırıb.

Vəkil Ramiz Məmmədov bütün ittihamları cəfəng adlandırıb, belə ki, digər cinayət işlərindən köçürülüb və psixi cəhətdən xəstə insanın ifadələrinə əsaslanıb.

Redaktorun Hüquqlarını müdafiə Komitəsinin həmsədri Arzu Abdullayeva bildirib ki, Məmmədovun işi üzrə proses qapalı olsa, ictimaiyyət məhkəmə binası qarşısında piketlər keçirmək niyyətindədir.

İş üzrə növbəti məhkəmə iclası fevralın 6-da keçiriləcək.

* Hilal Məmmədov 21 iyun 2012-ci ildə həbs edilib və Vətənə xəyanətdə, dini və milli ayrı-seçkilik salmaqda, narkotik saxlamaqda ittiham edilib. Məmmədovun təqsiri sübuta yetirilərsə, 15 il azadlıqdan məhrum edilə bilər. Beynəlxalq hüquq-müdafiə təşkilatları Hilal Məmmədovu vicdan məhbusu hesab edir. -16C-