Müsavat Partiyası polisin həddən artıq güc tətbiq etməsini pisləyib

Bakı/08.06.20/Turan: Müsavat Partiyası bəyanatla çıxış edərək ötən həftə sonu Bakıda və Azərbaycanın digər iri şəhərlərində sərt karantin rejimi çərçivəsində polisin vətəndaşlara qarşı həddindən artıq güc tətbiq etməsini pisləyib.

Partiyanın bəyanatında qeyd olunur ki, hüquq-mühafizə orqanları qanun çərçivəsində, məsuliyyətlə, hakimiyyətdən sui-istifadə etmədən  hərəkət etməli və qanunlarda nəzərdə tutulmayan tədbirləri tətbiq etməməlidir.

Müsavat Partiyası hesab edir ki, qanun pozucularına qarşı xəbərdarlıq və son halda cərimələr tətbiq olunmalıdır.

Müsavat Partiyası iyunun 8-də Dadaş Bünyadzadə küçəsindəki evin mənzillərinə məhkəmə sanksiyası olmadan girən və hüquqpozmalarda şübhəli bilinən vətəndaşları cinayətkar kimi güc tətbiq etməklə saxlayan DİN çevik polis alayının əməkdaşlarının hərəkətlərini pisləyib.

Partiya hesab edir ki, öz mənzillərində vətəndaşlarla amansız rəftar yaşlı və xəstə insanlar üçün psixoloji stresdir.

Elementar etik normalara əməl olunmaması Azərbaycan dövlətini və polisini rüsvay edir.

Müsavat Partiyası bu qanunsuz hərəkətlərə sanksiya verən və onları icra edən şəxslərin aşkarlanmasını və cəzalandırılmasını tələb edib. ––06D-