Müsavat Partiyası xəstə siyasi məhbuslara azadlıq tələb edir

Müsavat Partiyası həbsdə olan tanınmış hüquq müdafiəçisi Leyla Yunusun azad olunması tələbi ilə bəyanat yayıb.

Həbsdə olan hüquq müdafiəçisi, vicdan məhbusu Leyla Yunusun səhhətində ciddi problemlər olduğu, durumunun daha da ağırlaşdığı bildirilir. “Leyla Yunus məhbəsdə hər an həyatını itirə bilər”, - deyə müəlliflər xəbərdarlıq edirlər.

Həbsxana şəraitində belə ağır xəstəliklərin müalicəsinin mümkün olmadığı, daha da şiddətləndiyi və geriyədönməz xarakter aldığı xatırladılır. 

“Belə ağır durumda olan yaşlı bir xanımın həbsxanada dünyasını dəyişməsinə yol vermək olmaz və belə hadisə bütün dünyada ciddi əks-səda doğuraraq xalqın, dövlətin adına qara ləkə olar”, - deyə müəlliflər qeyd edirlər.

Müəlliflər indiki həssas məqamda hakimiyyəti, səlahiyyətli şəxsləri bir daha düşünməyə, gərəkli addımları atmağa çağırır. L.Yunusun, səhhətində ciddi problemlər olan digər siyasi məhbusların dərhal azad olunmasını səhhətlərini qaydaya sala bilmək şansı kimi dəyərləndirirlər.

“Əgər L.Yunus həbsxanada dünyasını dəyişərsə, bu hadisənin nəticələrini aradan qaldırmaq mümkün olmayacaq və bu fakt mövcud hakimiyyətin tarixinə qara hərflərlə əbədi həkk olunacaq”, deyə sənəd müəllifləri bəyan edirlər.

Son olaraq, müəlliflər iqtidarı məsələyə diqqətlə yanaşmağa çağırır, L.Yunus və s. siyasi məhbusların azadlığa buraxılmamasının dövlətin maraqlarına zidd olduğunu bir daha bəyan edirlər. -05D-