Müstəqil Dövlətlər Birliyi məsləhətləşmələrində ATƏT, NATO və Avropa İttifaqı ilə davranış xətti müzakirə edilib

Bakı/17.11.21/Turan: Minskdə Müstəqil Dövlətlər Birliyinin mənzil-qərargahında Müstəqil Dövlətlər Birliyi ölkələrinin çoxtərəfli beynəlxalq təşkilatlarda əməkdaşlığı məsələləri üzrə Xarici İşlər nazirlikləriarası məsləhətləşmələr keçirilib.

Müstəqil Dövlətlər Birliyi İcraiyyə Komitəsinin məlumatına görə, məsləhətləşmələrdə Azərbaycan (müşahidəçi qismində), Ermənistan, Belarus, Qazaxıstan, Qırğızıstan, Rusiya, Tacikistan, Özbəkistan və Müstəqil Dövlətlər Birliyi İcraiyyə Komitəsinin nümayəndələri iştirak ediblər.

Görüşdə Birlik ölkələrinin xarici siyasət idarələrinin nümayəndələri ATƏT-də qarşılıqlı fəaliyyət məsələlərini müzakirə ediblər. Əsasən, ATƏT Xarici İşlər Nazirləri Şurasının 2-3 dekabr 2021–ci ildə Stokholmda keçiriləcək toplantısında ümumi prioritetlər və mövqelərin koordinasiyası, ATƏT-in Müstəqil Dövlətlər Birliyi ölkələrində həyata keçirdiyi layihə və sahə fəaliyyətinin effektivliyi müzakirə edilib.

Həmçinin Avropa İttifaqı və NATO ilə qarşılıqlı əlaqələr mövzusu nəzərdən keçirilib. Onların arasında  "Şərq tərəfdaşlığı" proqramının həyata keçirilməsinin gedişi, Mərkəzi Asiya dövlətləri və Rusiyanın Avropa İttifaqı ilə münasibətləri də var.-0—