Müxalifətçi Faiq Əmirli 30 sutka həbs edilib (YENİLƏNİB)

Баку/09.04.20/Turan:  Müxalifətyönlü “Azadlıq” qəzetinin direktoru və AXCP rəhbərinin köməkçisi Faiq Əmirli cümə axşamı Səbayel məhkəməsi tərəfindən 30 sutka həbs edilib.

O, İnzibati Xətalar Məcəlləsinin 211-ci maddəsi üzrə karantin rejimini pozmaqda ittiham olunur. Bu barədə Turan-a müxalifətçinin ailə üzvləri məlumat veriblər.

Öz növbəsində partiyadan Turan-a bildiriblər ki, F.Əmirliyə qarşı ittihamlar cəfəngiyyatdır və həbsi onun siyasi fəaliyyəti ilə bağlıdır. 

AXCP lideri Əli Kərimli Facebook səhifəsində yazıb ki, F.Əmirliyə uydurma ittihamla maksimum cəza verilub.

Aprelin 8-də F.Əmirli saxlandıqdan dərhal sonra onun mobil telefonunu götürüblər. Kimdə olduğu indiyədək məlum deyil.

“Dünya birliyinin tənqidinə baxmayaraq, hakimiyyət koronavirusla mübarizə bəhanəsilə müxalifətçi və özgəfikirliləri “ovlamağa” davam edir”, - Ə.Kərimli yazıb.-0-

*   *   *

2020 Aprel 09 (Cümə axşamı) 14:56:36

Faiq Əmirlinin taleyi naməlum olaraq qalır YENİLƏNİB (YENİLƏNİB)

Ailə üzvləri Faiq Əmirli harada olduğunu dəqiqləşdirə bilməyib. Onun məhkəməyə aparlması barədə məlumat təsdiqlənməyib.

Daxili İşlər Nazirliyinin 102 xidmətindən ailə  üzvlərinə Əmirlinin harada  saxlandığı aydınlaşdırmayıblar.

*   *   *

2020 Aprel 08 (Çərşənbə) 23:44:45

AXCP fəalı karantin qaydasını pozmaqda günahlandırılır (YENİLƏNİB)

Faiq Əmirlinin həyat yoldaşı Lalə Əmirli  deyib ki, Səbail Rayon Polis İdarəsindən ona bildiriblər ki,  əri karantin qaydaların pozmaqda günahlandırılır. Ona qarşı İnzibati Xətalar Məcəlləsinin 211-ci maddəsi (Epidemiya əleyhinə rejimin, sanitariya-gigiyena və karantin rejimlərinin pozulması) tətbiq edilməklə Səabil rayon Məhkəməsinə göndərilib. Həmin maddənin sanksiyasında deyilir ki, epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər yüz manatdan iki yüz manatadək məbləğdə, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, hüquqi şəxslər iki min manatdan beş min manatadək məbləğdə cərimə edilir.

*   *   *

2020 Aprel 08 (Çərşənbə) 21:03:59

Faiq Əmirli saxlanılıb

Azərbaycan Xalq Cəbhəsi Partiyasının sədrin köməkçisi Faiq Əmirli saxlanılıb.

Bu barədə onun ailəsi məlumat verib. Məlunata görə, bir neçə mülki geyimli şəxs Əmirlini yaşadığı evin yanında maşına otuzduraraq naməlum istiqamətə aparıb. "Bir neçə maşınla gəlmişdilər. Faiqin qollarını buraraq maşınlardan birinə otuzdurub apardılar". 

Azərbaycan Xalq Cəbhəsi Partiyasından Turana bildirilib ki, Əmirlinin saxlanması onun siyasi fəaliyyəti ilə bağlıdır. 

Bakı Şəhər Baş Polis İdarəsinin mətbuat xidmətinin rəhbəri Elşad Hacıyev Turana bildirdi ki, Faiq Əmirlinin saxlanması ilə bağlı heç bir məlumatı yoxdur.