NATO PA-nın seminarında növbəti qalmaqal

Azərbaycan Ermənistanın NATO PA-dan xaric edilməsini istəyir. Bu təkliflə Milli Məclisin vitse-spikeri Ziyafət Əsgərov iyunun 17-də NATO PA-nın 86-cı “Rose Routh” seminarında çıxışında bildirib.

Tədbir iştirakçılarına müraciət edən Z.Əsgərov Ermənistan nümayəndələrini seminarı pozmaq cəhdində ittiham edib.

“Ermənistan nümayəndə heyəti burada təxribatla məşğul olur. Onlar məsələ qaldırmaq adı altında öz çıxışlarında Azərbaycana hücumlar edirlər”, - Z.Əsgərov bildirib. O, Ermənistanı terrorçu dövlət adlandırıb.

“Ermənistan terrorçu dövlətdir, Azərbaycanın 20% ərazisini işğal edib, ölkə ərazisində 30-dan çox terror aktı törədib. Odur ki, Ermənistanın NATO Parlament Assambleyasından çıxarılmasını vacib sayırıq”, - vitse-spiker vurğulayıb.

Sonra o qeyd edib ki, Ermənistanda terror siyasəti dövlət səviyyəsində həyata keçirilir.

Ermənistanın dövlət siyasəti terrorizmə əsaslanır. Ermənistanın başında terrorçu Serj Sarkisyan, ondan öncə isə terrorçu Robert Koçaryan dayanıb. Niyə Xocalı soyqırımından danışmırsınız?

Bu tədbirdə iştirak edən Tevan Poqosyanın atası (Jirayr Poqosyan, 1998-1999-cu illərdə Dağlıq  Qarabağda “baş nazir”) da terrorçudur, Dağlıq Qarabağda etnik təmizlənmə və hərbi cinayətlərdə iştirak edib. Bu, Azərbaycan Baş Prokururluğunun apardığı istintaqıa sübuta yetirilib. Və sənin atanın məsuliyyətə cəlb ediləcəyi gün uzaqda deyil”, - Z.Əsgərov T.Poqosyana müraciət edib.

Bunun cavabında Poqosyan bildirib ki, o, atası ilə fər edir, “çünki o, vətənini sevib”. Sonra o deyib ki, ötən dəfə erməni nümayəndə heyəti Bakıda tədbirdə iştirak edərkən Ermənistan rəhbərliyini “faşist”, indi də “terrorçu” adlandırdılar.

T.Poqosyan bildirib ki, müharibə Qarabağla aparılıb və problemin həlli üçün Azərbaycan Ermənistanla deyil, Qarabağla danışıqlar aparmalıdır.

Bundan sonra qalmaqala deputat Siyavuş Novruzov da qatılıb. O deyib ki, Qarabağın 90 min ermənisi 8,5 milyon nəfər əhalisi olan ölkə ilə müharibədə qalib gələ bilməzdi, ermənilərə Rusiya yardım göstərib. O, Xocalının və Azrbaycanın digər yaşayış məntəqələrinin işğalında Rusiya ordusunun 366-cı alayının iştirakını xatırladıb.

Bundan sonra Litva nümayəndəsi Azərbaycan və Ermənistan nümayəndələrini tədbirdən qarşılıqlı ittihamlar üçün istifadə etməməyə, konstruktiv dialoqa çağırıb. O həmçinin xatırladıb ki, yaranmış vəziyyətdə və münaqişə həll edilmədiyi şəraitdə “üçüncü tərəf” daha çox faydalanır.-06С-