Naxçıvan Gömrük Komitəsinin yüksək vəzifəli məmuru həbs edilib

Bakı/25.11.22/Turan: Naxçıvan Muxtar Respublikası Dövlət Gömrük Komitəsinin Gömrük tariflərinin tənzimlənməsi və ödənişlər şöbəsinin rəisi Mənsur Əsgərov xeyli miqdarda ziyan vuran oğurluğa görə həbs olunub.

Noyabrın 24-də Bakının Səbail Rayon Məhkəməsi onun barəsində 4 ay istintaq müddətinə həbs qətimkan tədbiri seçib. Ona qarşı Cinayət Məclləsinin 179.4-cü maddəsi (Mənimsəmə və ya israf etmə - xeyli miqdarda ziyan vurmaqla törədildikdə) ilə ittiham irəli sürülüb.

Məlumatlı mənbələrdən daxil olan məlumata görə, Dövlət Təhlükəsizliyi Xidmətində aparılan araşdırma zamanı Naxçıvan Dövlət Gömrük Komitəsi sistemində xeyli miqdarda oğurluq aşkar edilib. Əsgərov qabaqcadan əlbir olan bir qrup şəxslə birlikdə132 milyon manat dövlət vəsaitini mənimsəməkdə ittiham olunur.

Araşdırma zamanı Naxçıvan Dövlət Gömrük Komitəsinin vəzifəli şəxslərinin dövlət gömrük rüsumlarının rəsmiləşdirildiyi ümumi elektron sistemdən əlavə, rəsmiləşdirilmədən idxal olunan mallara görə qeyri-rəsmi ikinci yığım sistemi yaratdıqları müəyyən edilib.

179.4-cü maddə o deməkdir ki, bu dələduzluğa Naxçıvan gömrüyünün bir çox yüksək vəzifəli məmurları cəlb olunub. Bu şəxslərin adları hələlik açıqlanmayıb. Naxçıvanın digər dövlət qurumlarının yükəsk vəzifəli şəxslərinin də bu cinayətə cəlb olunduğu istisna deyil. 06D