N.Cəfərli: MSK İlqar Məmmədovun namizədliyinin qeydiyyatını əsassız olaraq uzadır

MSK REAL hərəkatının lideri İlqar Məmmədovun prezidentliyə namizədliyinin təsdiqi məsələsinə baxılmasını qeyri-müəyyən vaxta qədər uzadıb.

Səbəb kimi o göstərilir ki, 19 avqustda təqdim edilən sənədlərdə Məmmədovun imzası qanunvericilikdə nəzərdə tutulan qaydada təsdiq edilməyib.

Amma səbəb odur ki, notarius təcridxanaya Məmmədovun yanına vaxtında buraxılmayıb.

Öz növbəsində REAL hərəkatının icraçı katibi Natiq Cəfərli Turan-a bildirib ki, Məmmədovun sənədləri MSK-ya 19 avqustda göndərilib. Bundan əlavə, avqustun 23-də Məmmədovun təsdiq edilən imzası ilə təkrarən MSK-ya göndərilib.  

Cəfərlinin fikrincə, MSK Seçki Məcəlləsində göstərilən 5 gün ərzində prezidentliyə namizədin sənədlərini qəbul etməməklə qanunu pozub.

«Məsələyə baxılması qeyri-müəyyn müddətə təxirə salınıb. Bu, Azərbaycanın seçki praktikasında görünməmiş hadisədir. MSK qəsdən İlqar Məmmədovun təsdiqini ləngidir ki, imza yığmağa vaxt qalmasın, o, seçkilərdə iştirak imkanından məhrum olsun», - deyə Cəfərli bildirib.

İlqar Məmmədov 23-24 İsmayıllıda baş verən hadisələrlə bağlı fevralın 4-də həbs olunub. O, kütləvi iğtişaşlar təşkil etməkdə və polisə müqavimətdə ittiham edilir.

REAL hərəkatı və beynəlxalq hüquq müdafiəçiləri Məmmədovun həbsini siyasi motivli sayır. Amnesty International Məmmədovu «vicdan məhbusu» adlandırıb.—06B--