Niyə müstəqil jurnalistləri azad edilmiş ərazilərə dəvət etmirlər?

Milli Mətbuat Günü ərəfəsində Şuşada Qlobal Media Forumu keçirilib. Forum artan dezinformasiya şəraitində jurnalistlərin işinə həsr olunub. Forumun iştirakçıları - Azərbaycandan və digər ölkələrdən 200-ə yaxın jurnalist Şuşaya səfər edib, sessiyalarda iştirak edib və prezident İlham Əliyevin çıxışını dinləyib.

Bir çox məsələ müzakirə olunub, lakin iştirakçıların heç biri həbsdə olan jurnalistlər Sevinc Vagifqızı, Nərgiz Absalomova, Elnarə Qasımova, Ulvi Həsənli, Hafiz Babalı, Müşviq Cabbar, Əli Zeynal və başqalarının azadlığa buraxılmasını təklif etməyib və Forum hakimiyyətə belə müraciət qəbul etməyib. Qlobal Forum günahsız adamların aylarla həbsdə olmasına səssiz qalıb. Bəlkə də bunun səbəbi odur ki, iştirakçıların heç biri həqiqətin və yalnız həqiqətin işıqlandırılmasına sadiq olan KİV-i təmsil edən müstəqil  jurnalist olmayıb.

Azad edilmiş ərazilərdəki müxtəlif forumların təşkilatçıları niyə müstəqil medianı dəvət etmirlər? Jurnalist Çingiz Sultansoy absurd ittihamlarla mühakimə olunmamaq üçün təcili olaraq başqa ölkəyə köçmək məcburiyyətində qalanlardan biridir.

Azad edilmiş ərazilərdəki forumlarda əsl jurnalistlərin olmaması ilə bağlı Turan-ın sualına cavabda o razılaşıb ki, 28 illik erməni işğalından azad edilmiş Şuşaya - təkcə jurnalistlərin yox, demək olar ki, bütün Azərbaycan vətəndaşlarının arzuladığı yerə - səfər kimi imtiyaz müstəqil yox, loyal jurnalistlərə verilir.

"Məlumdur ki, Şuşaya elə-belə gedə bilməzsən - yollarda polis və hərbi postlar buraxmayacaqlar, keçmək üçün isə xüsusi icazə lazımdır. İcazə də loyal KİV və onların jurnalistlərinə verilir", - o belə hesab edir.

"Hakimiyyətin mövqeyi və siyasəti belədir - heç olmasa bir növ öz müstəqilliyini saxlayan jurnalistləri dəvət etməmək, onların hüquqlarına,  hətta mövcudluğuna məhəl qoymamaq. Bu cür siyasət ölkədə söz və mətbuat azadlığının yavaş, lakin düzgün şəkildə məhv edilməsi, azad və müstəqil mətbuata qarşı hər cür repressiyaların tətbiqilə bağlı ölkə rəhbərliyinin uzunmüddətli strategiyasına tam uyğundur. Repressiyalar 30 ildir dayanmır.

Zəifləmə dövrləri durmadan sərtləşmə dövrlərilə əvəz olunub və təkrarlanıb. Repressiyaların son dalğası ötən ilin payızında baş verib. “Abzas Media” saytının təsisçisi Ülvi Həsənli, baş redaktor Sevinc Vaqifqızı və saytın bir qrup əməkdaşı həbs olunub. Daha sonra “Toplum” TV Youtube kanalının həmtəsisçisi, tanınmış vəkil Ələsgər Əhmədoğlu və kanalın bir neçə əməkdaşı, həmçinin populyar “Kanal 13”ün aparıcısı əziz Orucov həbs olunublar.

Bu gün - 22 iyul Milli Mətbuat günüdür. Təəssüf ki, o, hökumətyönlü və müstəqil olaraq bölünüb. Keçmiş deputat Gültəkin Hacıyeva 22 iyulu Milli Mətbuatın Anım Günü adlandırıb.

"Həmin gün tanınmış jurnalistlər Elmar Hüseynov və Rafiq Tağının sifarişli qətllərini yada salmaq lazımdır. Qatillər tapılmayıb, sifarişçilər məlum deyil. Aydındır ki, bu cür açılmamış qətllər küncə sıxışdırılmış və sağ qalmaq üçün mübarizə aparan müstəqil Azərbaycan mətbuatı üçün ən yaxşı senzura formasıdır", - Çingiz Sultansoy bildirib.

"Şərq-Qərb" Analitika Mərkəzinin rəhbəri Ərəstun Oruclu hakimiyyətin həqiqəti bildirən jurnalistlərə etinasızlığı barədə sualı cavablandırarkən deyib ki, Şuşada forumun iştirakçılarının siyahısına baxanda aydın olur ki, onlar Azərbaycan hakimiyyətini öz sözlərilə dəstəkləyənləri bir araya gətiriblər. Bakı, Tbilisi, Rusiya və digər yerlərdən gələn qonaqlar hakimiyyəti təbliğ edirlər. Müstəqil mətbuat bununla məşğul olmur. Müstəqil KİV-i dəvət etmirlər, çünki onlar təbliğatçı deyillər və hadisələri hakimiyyəti tərifləmədən işıqlandırırlar", - o deyib.

"Azərbaycan rəhbərliyi cəmiyyətin, siyasətin və KİV-in parçalanması siyasətini aparır: siyasi partiyaları, vətəndaş cəmiyyətini və mətbuatı "özününkülər" və "özgələr"ə bölür. Ona görə də bu cür forumlarda ancaq hakimiyyətə loyal KİV iştirak edə bilər. Orada onlar öz peşə vəzifələrini yerinə yetirmirlər, rəhbərliyin göstərişlərini dinləyirlər. Orada müstəqil KİV yoxdur və bu, təəccüblü deyil", - Ərəstun Oruclu əlavə edib.

"Hakimiyyət niyə müstəqil jurnalistləri dəvət etməlidir, əgər Azərbaycanda onlar yoxdursa? Ölkədə hakimiyyətə ictimai nəzarət institutu kimi KİV yoxdur,  hakimiyyətə isə yalnız azad mətbuat nəzarət edə bilər", - siyasi mühacir, jurnalist Rauf Mirqədirov Turan-ın sualına cavab verib.

P.S. Turan-ın jurnalisti, həbsdə olan Hafiz Babalı istintaq təcridxanasından öz xahişini çatdırıb: zəhmət olmasa, Milli Mətbuat günündə Həsənbəy Zərdabinin məzarına məhbus jurnalistlərin adından senzuranın və repressiyanın simvolu olaraq bir neçə qərənfil və qızılgül qoyun.