Novruz Məmmədov Əliyevlərin İsrailə 600 milyon dollar investisiya qoymasını təkzib edir

Bakı/31.08.17/Turan: Tel-Əvivdə keçirilən mətbuat konfransında İsrailin turizm naziri Yariv Levin bildirib ki, bir neçə ay öncə Azərbaycan prezidentinin xanımı və oğlu Hayfada 6 mln. dollara villa alıblar. Bu barədə İsrailin Haaretz qəzeti məlumat yayıb.

Qəzetin məlumatına görə, Azərbaycan prezidentinin ailəsi İsrail birjasına 600 mln. dollar şəxsi vəsait yatırıb.

Prezidentin oğlu Heydər Əliyev bir neçə ay Hayfadakı villada İsrail həkimlərinin nəzarətində qalıb və "ağır xəstəlikdən sağalıb".

Bundan əlavə, qəzet yazır ki, son beş ildə Azərbaycan prezidentinin xanımı İsrailə xeyli vəsait qoyub və ölkənin xeyriyyə fondları ilə sıx əməkdaşlıq edir.

Prezident İlham Əliyevin köməkçisi Novruz Məmmədov bu məlumatı "böhtan" adlandırıb. Onun sözlərinə görə, prezidentin oğlu, ümumiyyətlə, heç vaxt İsraildə olmayıb.

"Bu cür yazıların reallıqla heç bir əlaqəsi yoxdur", - N.Məmmədov vurğulayıb. O deyib ki, İsrailin turizm naziri təkzib verməlidir.

Qeyd edək ki, N.Məmmədov İsrailin turizm nazirinin dediyi kimi, Hayfada villa alınması məsələsini təkzib etməyib.-02D-